Ka Indian Registration Act, 1908 ka pynïaid ryntih ïa ka jing registar jong ki dulir bad ki kiwei pat ki kot ki sla ha baroh kawei ka Ri India. Ka section 17 jong ka Act ka batai shaphang jinglong compulsory registration jong ki dulir bad kiwei ki kot ki sla.Ka Sorkar Meghalaya da ka Notification No. ERT (T) 62/81/11 Dated 22nd July 1982 ka la pyndonkam ïa ka Indian Registration Act, 1908 ha baroh kawei ka jyllla Meghalaya naduh ka tarik 1st September, 1982. Namarkata, hadien ka 01-09-1982 ha Meghalaya ka la long compulsary ban register ia dulir jaka bad kiwei ki kot ki sla kiba donkam ban register kat kum ka aiñ.
Ban register ïa ka dulir bad kiwei ki kot ki sla nalor kiwei pat, u / ka ki don kam ban siew ïa ka stamp duty katkum ka jingshah jingdonkam bad ka bai registration. Kine ki jingsiew ki kylla na ka por sha ka por, katkum ka dor jong ka jaka bad kiwei pat. Ka dor jong ka stamp duty bad ka bai register ka pher na kiwei pat ki jylla jong ka Ri India. Ha ka ba ïadei bad ka ïadie ïathied jaka, buh bynda, aiwai bad kiwei pat ki lad ai pateng jaka.Ka jingshah jingdonkam ban siew ïa ka stamp duty ka long ha ka dor ba lah buh kat kum ka dor jong ka jaka ban ïadie ïathied, buh bynda, aiwai ka shong nongrim hynrei ha kaba ïadei bad ka gift deed/dulir aisngewbha ka long ka bym shong nongrim satia.
Ka registration jong ka dulir ai sngewbha jaka ka long compulsory. Ka dulir aisngewbha jong ka jaka puta ka long barabor hapdeng shiïing shisem bad shidoh shisnam, ka dei ka jingai sngewbha da ka jingieid khlem don kano kano ka jingsiew kum ba long ha ka ba ïadie ïathied buh bynda bad aiwai. Ha ka baïadei bad ka jing-ai sngewbha jaka ka nongai jaka kam ioh pisa, bad ka jingsiew ïa ka stamp duty kat kum ka dor ïew jong ka jaka ka long ka bymshong-nongrim satia. Namar kane ka wanrah ïa ka jingkhiah kaba khraw halor ka nongai namar ka nongai sngewbha ïa ka jaka namar ka hap ban siew ïaka stamp duty bad ka bai registration.
Ha ki nongkyndong, dang bun ki briew kiba don ki jaka baheh hynrei kim don pat ka pisa. Ha ngi ki Khasi bun ki briew ki ba ïoh pateng ïa ki jaka jong ki kat kum ka riti dustur jong ki Khasi. Kumta lada mynta ki kwah ban aisngewbha shibynta na ka jaka jong ki ha ki khun, kim lah ban register ïa dulir ai-sngewbha namar kim lah ban siew ïa ka stamp duty halor ka dor iew jong ka jaka ba ki mut ban ai sngewbha ha ki khun jong ki. Kumta kine ki briew ki ïasoi da ka dulir aisngewbha ba khlem register ha ka jingïadon ryngkat jong kiba haïing. Bunsien ki briew ki leit ban shna dulir aisngewbha ba khlem register ha khmat ki dkhot jong ka Dorbar Shong da ka jingsngewthuh bakla ba kum kine ki dulir ai-sngewbha ba la soi hakhmat ki dkhot jong ka Dorbar Shnong ki long ki paka na baroh ki liang. Ka unregistered gift deed/dulir aisngewbha kam don jingskhem ha khmat ka aiñ bad ïa kum kine ki dulir aisngewbha ba khlem register kat kum ka aiñ ym ju pdiang da ka bank ban shim loan lane buh bynda, lane aiwai ïa ka jaka.
Ban pynshlur ïa ki briew ban kin mih shakhmat ban register ïa ki gift deed/dulir aisngewbha ki sorkar jong kiwei ki jylla ha Ri India ki la pynduna ïa ka stamp duty. Bad don ruh kiwei pat ki jylla ha ka ba ki Sorkar jylla jong ki, la buh ïa ka dor stamp duty ha ka dor 0.5% halor ka dor iew jong ka jaka bad don ruh ki Sorkar jylla ki ba shim tang Rs. 10,000/- ne duna ruh ban register ia ka gift deed /dulir ai-sngewbha .
Ka Sorkar Meghalaya ka don kam ban pyrkhat bha halor kane ka phang bad leh ïa kaba donkam ban pyllait noh ïa ka stamp duty ban register ïa ka gift deed/dulir aisngewbha hapdeng shiïing shisem bad kiba ïadei shidoh shisnam bad buh ruh da ka dor ba duna ban register ïa ki gift deed/dulir aisngewbha. Kane ka lah ban ïaid jngai ban bishar ïa kane ka phang jong ka jing registar ïa ka gift deed / dulir ai-sngewbha bad kane kan long ka na ka bynta ka jing-bha jong ki baroh.
Kaba burom ïa phi
Aneeta Synrem
Polo Hills, Near Party Decorators
