Jowai, Jymmang:
Ka Sub Center Tornado Security Agency kaba don ha ka Shnong Iooksi Umdeinlin, West Jaiñtia Hills District ha ka 9 tarik Jymmang ka la sam syrnod sha 65 ngut ki samla shynrang bad kynthei kiba la pyndep ïa ka jinghikai ban long ki nongap pahara ne Security Guard.
Ha shwa ban sam syrnod sha ki 65 ngut ki samla, la don ka jingïalang ba la pynïaid da u Camp Commander & Training Incharge uba dei ruh u trai jong kane ka shlem hikai u Bah Pyndaplang Muksor, ha ka jingdonlang u OC Raliang Bah P Najiar kum u kongsan, u Bah W Nongtdu kum u symbud kongsan nalor kiwei kiwei.
Ïa ki 65 ngut ki samla la pynbam smai da u Rev W Tang ha ka jingdonlang ki bahaïing hasem jong ki samla.
U Bah P Najiar ha ka jingkren u la ong, ka jingdon jong kane ka shlem ai jinghikai kan long ka lad bad ka kabu ksiar ïa ki khun samla bad ha kajuh ka por u la kyntu ïa ki ban long ki samla kiba ïaishah khnang ban ïoh kheit ïa u soh ba thiang.
U trai ka shlem u Bah Pyndaplang Muksor u la ong ban seng ïa ka jaka ai jinghikai kam dei ka kam kaba suk bad kumta u la kyrpad ïa ki paidbah khamtam ka sorkar ban ai ka jingkyrshan ïa kane ka jaka ai jinghikai.
La pynphuh ïa kane ka sngi da ka jingïashim bynta ki 65 ngut ki samla ha ka jingïaid march Pass, ki jingrwai bad ki jingshad pynbyrngia.
