Shillong, Jymmang 15
Ka kynhun ïalehkai ka Jylla kan pynkhreh ïa ka jingïakhun kaba khatduh jong ka Group-F ha ka lympung ïalehkai U-20 Men’s National Football Championship pyrshah ïa ka Maharashtra ha ka Sngi Palei ha Narainpur, Chhattisgarh.
Kane ka kynhun hapoh ka jingïalam u Bah Jeffrey Warlarpih (coach) ka donkam ban jop ha kane ka jingïalehkai kaba khatduh khnang ban pynurlong ban ïoh rung sha ka quarter final.
Kumba ka paw kane ka kynhun ïalehkai ka Jylla ka don ïa ki 3 point na ki ar sien ïakhun hadien ba ka la lah ban pynliem noh ïa ka Rajasthan da 3-2 kol ha ka Sngi Ba-ar. Kane la wan lyngba u Richie Kharbani (28), Iashanbok Buh-phang (44) bad u Willbeson Jaba (90+1), katba na ka Rajasthan la thep da u Sameer Gurung (51) bad u Aashish Sarkar (73).
Ha ka jingïalehkai kaba nyngkong kaba la long ha ka Sngi U Blei, ka Meghalaya ka la mad ïa ka jingshah rem ha ka Mizoram da 5-0 kol.
