Shillong, Jymmang 15
U lahduh jong ka Olympic u Neeraj Chopra u la khur ïa ka takma ksiar ha ka jingkawang sum jong ki shynrang ha ka Federation Cup ha ka Sngi Balang bad kane ka long ka takma kaba nyngkong eh kaba u la ïoh ban khur ha la ïing ha ki lai snem.
Une u khlur ïalehkai ba dang 26 snem ka rta ha kaba nyngkong u la shem jingeh ha kane ka lympung bad u la wan ba-ar haduh kaba kut jong ka jingpyrshang ka wat kaba lai. Hynrei u la lah ban tam ha ka wat kaba saw da kaba u la lah ban kawang 82.27 mitar bad um shym la ïakhun shuh ha ka wat kaba khatduh namar u la tam lypa ïa u DP Manu, uba la khur ïa ka takma rupa.
Kumba ka paw u Chopra u la ïashim bynta ha kane kajuh ka lympung ïalehkai hapoh ka ri ha ka 17 tarik u Lber jong u snem 2021, ha kaba u la khur ïa ka takma ksiar da kaba u la lah ban kawang ha ki 87.80 mitar.
Naduh katei ka por ka la pynlong ïa u Chopra uba la khur ïa ka takma ksiar ha ka Tokyo Olympics, ban long u lahduh ha ka Diamond League ha u snem 2022, kumjuh ha ka World Championship ha u 2023 bad u la bat ruh ïa ka nam lahduh da kaba khur ïa ka takma ksiar ha ka Asian Games kaba la long ha China.
U la khur ïa ka jingjop lai sien ha ka jingïakhun kaba para marwei jong ka Diamond League bad u la khur ruh ïa ka takma rupa ha ka World Championship 2022. U la lah ban bat ruh ïa ka rekod da kaba la lah ban kawang haduh 90 mitar.
