Rouen, Jymmang:
Katkum ki khubor, la ong ba ki riew-kieng atiar ki la leit ban thombor ia ka kali (van) pulit ha ka Sngi Ba-ar ha kaba 2 ngut ki heh pulit kiba dei khmih ia ka patok ha thaiñ Shathei jong ka France ki la khlad ha katei ka jingjia. Kitei kynhun kieng atiar ki la ioh ban pyllait noh ruh ia 2 ngut ki runar kiba la shah kem mynshem taiew bad kiba don hapoh jong katei ka kali ha katei ka sngi.
Na ka liang u President ka France- u Emmanuel Macron u la bthah ia ki bor pyniaid bad ka tnat pulit ba ka dei ban thwet kloi-kloi ia kitei kynhun runar bad ia kito kiba don kti ha katei ka kam baroh ba ki dei ban shah pynshitom bad pynngat hapoh ki kyndon pynkheiñ aiñ ba la buh jong ka ri kiba ïahap katkum ka jingleh jong ki.
La ong ba 2 ngut ki heh pulit kiba dei khmih ha ka patok kaba set ia kitei 2 ngut ki koidi, ki la duh noh ia ka jingim ha katei ka jingshah thombor ha katei ka sngi. Katba, 2 ngut kiwei pat ki pulit ki dang don hapdeng ka jingsumar hadien ba ki la mynsaw na ka jingshah ther kuli ha kitei ki runar.
Wat la katta, la ong ba kitei ki heh pulit kiba im ruh ki don pat hapdeng ka jingma kaba khraw kaba ap ia ka jingim jong ki namar ki jingmynsaw kim long shuh kiba malu-mala.
Katei ka jingjia, ka la jia ha ka step Sngi Ba-ar ha ka surok ha Incarville kaba don hapoh jong ka thaiñ Eure jong ka France.
Namar la ong ba katei ka tnat pulit ka dang phah ia kitei ki pulit ban pynkynriah noh ia kitei 2 ngut ki koidi na kawei ka shnong sha ka shnong Evreux bad ban pyndep ia ka jingbishar kaba sah baroh da ka ïingbishar na Rouen jong ka Normandy.
Katkum ka jingiathuh jong ki pulit, la ong ba katto katne ki riew kieng atiar ki la ap lypa ha katei ka surok ba katei ka kali ka dei ban iaid lyngba ha katei ka sngi bad ki la leit ban ther kuli ia baroh ki pulit kiba don hapoh jong ka kali bad hadien kata ki la phet noh krad noh na ka khlaw kaba don ha katei ka jaka. Hynrei la ong ba uwei napdeng jongki ruh u la mynsaw ha ka jingiakhun markylliang bad kitei ki pulit hynrei u dang lah ban phet namar ka jingmynsaw kam shym la long kaba jur.
Watla katta, la ong ba kitei ki pulit kim shym kynmaw shuh haduh katno ngut kitei ki riew kieng atiar ki ïadon ha katei ka sngi namar hapdeng ka jingiakhun ki la shu iakhun tang ban iada ia la ka jong ka jingim bad kitei ki runar ruh ki la phet krad noh tang mar ia ioh pyllait ia kitei ki 2 ngut ki koidi napoh katei ka kali.
Hadien katto katne kynta, la shem pat ia katei ka kali ba la pyndonkam da kitei ki runar kiba leit poi sha katei ka jaka bad ba katei ka kali ka la shah thang bad sah sa tang ki dien ba la ingkhong.
