Shillong, Jymmang 15
Ki khlur ïalehkai badminton ka ri u Satwiksairaj Rankireddy bad u Chirag Shetty ki la jam sha ka pre-quarter final ha ka men’s doubles jong ka Thailand Open, hadien ba ki la lah ban pynliem ïa ki shijur na Malaysia u Nur Mohd Azriyn Ayub Azriyn bad u Tan Wee Kiong da 21-13 21-13 ha ka jingïakhun kaba la neh 34 minit.
Kumta u Satwik bad u Chirag kin ïakynduh pyrshah ïa ki shijur na China u Xie Hao Nan bad u Zeng Wei Han ha kawei pat ka wat jingïakhun.
Ha kawei pat ka liang u H.S Prannoy u la shah rem noh ha ka jingïakhun kaba nyngkong para marwei jong ki shynrang ha u Meiraba Luwang Maisnam da 19-21 18-21 ha ka jingïakhun kaba la neh 55 minit.
Te kumta u Meiraba un pyn-khreh ban ïakhun pyrshah ïa u rangïalehkai na Denmark u Mads Christophersen, uba la lah ban pynliem noh ïa u rangïalehkai ka ri India u Kiran George da 21-15 13-21 21-17.
Ha ka women’s singles, ka Ashmita Chaliha ka la lah ban jam sha ka wat kaba ar hadien ba ka la lah ban pynliem noh ïa ka nongïalehkai na Indonesia ka Ester Nurumi Tri Wardoyo da 19-21 21-15 21-14.
Te kumta ka Ashmita kan ïakynduh ïa ka nongïalehkai ba kynsai na China ka Han Yue, kaba la lah ban pynliem ïa ka nongïalehkai ka ri India ka Malvika Bansod da 21-11 21-10. Katba u Unnati Hooda um shym la lah ban jam shaphrang na ka wat kaba nyngkong ha kaba u la shah rem noh da 21-14 14-21 9-21 ha u rangïalehkai na Belgium u Lianne Tan.
