Mumbai, Jymmang:
Ka kynhun nongbishar jong ka Bombay High Court ha Aurangabad dang shen ka la kyntait ïa ki jingmudui ba la phah da u Myntri Rangbah barim jong ka Andhra Pradesh bad u heh nongïalam jong ka seng Telugu Desam Party (TDP) u N Chandrababu Naidu bad jong u Myntri barim jong ka TDP u Nakka Ananda Babu kaba la dawa ba la dei ban weng noh ïa ka jingujor ejahar ba la buh da ki pulit jong ka Nanded ha u snem 2010 halor ka jingshah kynnoh ba ki la ktah kti ïa ki pulit ha ka por ba ki la shahkem ha kaba ïadei bad kawei ka jingjia.
Ka kynhun nongbishar jong u Justice Mangesh S Patil bad Justice Shailesh P Brahme ha ka jingbishar jong ka ha kaba ïadei bad ka jingkyrapd jong kine ki arngut ki nongïalam, la ong ba ka ïingbishar kam shym don kano-kano ka jingsngew artatien ha kaba ïadei bad ki sakhi ban pyntikna halor ka jingdonkti jong kine ki arngut halor kane ka kam beaiñ jong ki.”
Ïa ka jingmudui ejahar la buh ha ka 20 tarik, Naitung, 2010 ha kaba ki pulit jong ka Dharmabad ha Nanded distrik ki la buh jingmudui halor ki kam beaiñ jong ki pyrshah ïa ki pulit kiba don bynta ban pyndep ïa ka kamram jong ki ha kaba ki la ktah kti ïa ki da ki tiar pynmynsaw ha kaba kane ka la buh jingma shibun ïa ka jingim bad pynduh ka jingshngaiñ na ka bynta ki pulit ban pynibor pyrshah ïa ki nongleh bymman, kine ki la shah pynngat halor kiba bun ki kyndon jong ka Indian Penal Code.
Katkum ka jingmudui, la ong ba ki nongïalam jong ka seng TDP ki la ïaid lyngba na Telangana sha Maharashtra na ka bynta ban pynlong ïa ka jingïakhih ha Babli Barrage kaba don ha Nanded distrik ha u bnai Naitung jong u snem 2010.
Ki nongïalam kiba don ha ka liang pyrshah jong ka jylla ba pura jong ka Andhra Pradesh, ki la pynlong ïa ka jingïakhih ban pyrshah halor ka Dam kaba don ha shi lynter jong ka wah Godavari naba kane ka wah ka la tuid sha ki thaiñ ba sharum ha Telangana ha kaba la ong ba kane kan sa ktah jur bad buh jingeh ïa ki nongshong shnong.
U Naidu bad u Babu ha ryngkat kiwei pat ki la shahkem halor ka jngïakhih jong ki ba la pynlong ha ka 17 tarik, Naitung ha utei u snem bad kine ki la shah set bad shah buh ha ka patok kaba shipor kaba don ha Government Rest House ha Dharmabad.
U Deputy Inspector General (Prisons) jong ka jylla u la hukum ba la dei ban pynkynriah noh ïa ki sha Aurangabad Central Jail namar ka jingbym biang jong ki lad ïada.
Ha kaba ïadei bad kane, u Naidu, u Babu bad kiwei pat ki la shah pynshisha ba ki la kyntait ban ïatreilang bad ki pulit bad ki la pyninia bad ki la dawa ba la dei ban pynïoh ïa ki da ka bos kaba don ka jingpynmih lyer pyngngad na ka bynta ban pynkynriah jaka ïa ki.
Ha ka sngi kaba bud, kata ha ka 20 tarik, Naitung, haba u Jailer u la bthah ïa ki ba kin kiew ha ka bos, kine ki nongmudui ki la kyntait bad ki la byrngem ba lada pynbor ïa ki ban kiew kan sa don ka jingïakynad kaba jur hapdeng ka jylla Maharashtra bad Telangana.
Ki la shah pynshisha ba ki la pyndonkam da ki ktien kiba sniew bad ktah kti ïa ki pulit bad katto katne ki pulit langrut ha kaba hadien kane la hap ban khot shuh shuh ïa ki pulit ha kaba ïa kine kiba la shah kynnoh la lah ban pynkynriah sha ka patok kaba don ha Aurangabad ha kaba hangne la buh ïa ka jingmudui ejahar pyrshah ïa ki.
