Shillong, Jymmang 15
Ki ar kol ba la thep da u Erling Haaland ki la biang pura ïa ka Manchester City ban jop da 2-0 kol ïa ka Tottenham Hotspur na ka bynta ban pynlong ïa kane ka kynhun ban nangjan ban kynjoh ïa ka nam lahduh kaba saw ha ka Premier League.
Ka jingïoh ban thep kol utei u rangïalehkai sha-khmat ka Norway ka long lyngba ka jingïarap pynbuh da u Kevin De Bruyne bad kawei pat ka dei lyngba ka penalty ha shwa ban kut ka jingïalehkai. Kane ka la pynsngap jar ïa ki paidbah hapoh ka stadium jong ka Tottenham Hotspur bad ruh ban pynlong ïa ka City ban tam 2 point ïa ka Arsenal kaba don ha ka kyrdan ba-ar.
Kumta lada ka City ka jop ïa ka West Ham ha ka Sngi U Blei ha Etihad Stadium kan pynlong ïa kane ka kynhun jong u Pep Guardiola ban rah syndon ïa ka nam lahduh, katba ka Arsenal kan ïakhun pyrshah ïa ka Everton. Haduh mynta ym pat don ki kynhun jong kane ka lympung ki ban rah ïa ka nam lahduh haduh saw sien.
Shuh shuh ka jingshah rem ka Spurs ka la lah ban pynthikna ïa ka Aston Villa ban ïoh rung sha ka Champions League ha ka aïom ka ban wan ryngkat ka City, Arsenal bad ka Liverpool, kaba la wan ha ka kyrdan balai.
Haba phai sha katei ka jingïakhun baroh ar kynhuh ki la ïakhun tyngeh naduh kaba sdang. Wat la ki la ïoh ïa ki kabu kiba biang, hynrei kim shym la lah ban thep kol haduh kaba kut jong ka kylla step. U rangapkol ka City u Ederson u la lah ban khanglad ïa ka jingpyrshang u rangialehkai ka Spur u Rodrigo Bentan-cur, katba u rangapkol ka liang pyrshah u Guglielmo Vicario u la lah ban khanglad ïa ka jingpyrshang u rangïalehkai ka City u Phil Foden uba la ïoh ban shut na jngai.
Dei ha ka minit kaba 51 jong ka kylla miet ba Haaland u la ïoh ban pynkhih jar nyngkong eh hadien ka jingïarap pynbuh bol da u De Bruyne.
Hadien katto-katne por u De Bruyne bad u Ederson ki la ngat ha ka jingmynsaw. Kumta ha jaka u Ederson la mih bujli noh da u Stefan Ortega, uba la lah ban khanglad na ka jingpyrshang u Dejan Kulusevski bad u Son Heung-min.
Ha shwa ban wai artad ka jingïalekai ka City ka la thep biang sa shi kol lyngba ka penalty ha ka minit kaba 91 ba la shut da u Haaland na ka bynta ban pynlong ïa une rangïalehkai ban don haduh 27 kol ha kane aiom.
