Shillong, Jymmang 15
Ka India kan pynkhreh ban pynkhlaiñ ïa ka kynhun na ka bynta ka European leg jong ka FIH Pro League ha shwa ba kan pyllait ïa ka thup kyrteng kaba khatduh na ka bynta ka Paris Olympics, la pynpaw u kapten ka kynhun u Harmanpreet Singh ha ka sngi Ba-ar.
Kane ka kynhun ka la leit sha Antwerp, Belgium ha ka Sngi Ba-ar na ka bynta katei ka lympung ha kaba ka kynhun ka ban khur ïa ka jingjop yn ithuh kum kaba khlaiñ bor. Kumba ka long mynta ka India ka la don ha ka kyrdan balai kata hadien ïa ka Netherlands bad ka Australia, ha kaba kan hap ban ïakhun pyrshah ïa ka Belgium bad Argentina ka ban long ha Antwerp hapdeng ka 22 bad 26 tarik mynta u bnai. Hadien yn bud sa ka jingïakhun pyrshah ïa ka Germany bad ka Great Britain naduh 1 haduh 9 tarik u Jylliew ha London.
“Ngi la pyrshang ban long kum ka kynhun kaba khlaiñ bor hashwa ban pynbna ïa ka kynhun kaba khatduh na ka bynta ka Olympics. Te kumta ka Pro League ka long kaba kham kongsan na ka bynta katei la lympung ka ban long ha Paris bad ruh ban jied ïa ki 16 ngut ki rangïalehkai kiba kynsai na ka bynta ka Paris,” la ong u Harmanpreet ha ka kyrwoh jong ka Hockey India hashwa ba kane ka kynhun kan leit sha Europe.
Ha u bnai ba la lah, ka India kaba la khur ïa ka takma rnong ha ka Tokyo Olympics, ka la shah rem baroh san sien ha Australia bad kane ka la pynartatien halor ka jingpynkhreh na ka bynta katei ka lympung ka ban long ha Paris.
“Ka kynhun ka la thrang ban ïalehkai bha na ka bynta ban jam sha kawei pat ka lympung ïalehkai bad ngi la pynkhreh ban long kum kawei na ki kynhun kaba kynsai ha ka Pro League. Te kumta ngi la pynkhreh bha namar ka Pro League ka long ka lympung ïalehkai kaba kongsan hashwa ban jam sha ka Olympics,” la bynrap u Harmanpreet.
