Chandigarh, Jymmang:
U shongknor jong ka seng Aam Aadmi Party (AAP) ha ka ri bad u Myntri Rangbah jong ka Delhi u Arvind Kejriwal, ka kurim jong u ka Sunita Kejriwal, u Myntri Rangbah jong ka Punjab u Bhagwant Mann bad u nongïalam jong ka seng uba dang shah set patok u Manish Sisodia ki la long ki nongïalam hapdeng ki 40 ngut ki nongïalap ilekshon kiba la shah pynbna kyrteng da ka seng ba kin ïalap ilekshon na ka bynta ka ilekshon Lok Sabha ka ban long ha ka 1tarik, Jylliew ha Punjab.
U Kejriwal, u la shahkem ha ka kynhun Enforcement Directorate ha ka 21 tarik, Lber ha kaba ïadei bad ka jingshah kynnoh donkti ban pyndkoh treikam hapoh ka tnat Excise, u la shah pyllait jamin shipor ha ka sngi Thohdieng hadien ka jingai rai jong ka Supreme Court. Une u la shahjied ba un long u nongïalam na ka bynta ban leit ïalap ilekshon na ka bynta ka seng AAP ha Punjab, kumba la paw ha ka thup kyrteng jong ki nongïalap ilekshon ba la phah da ka seng sha ka Election Commission of India.
Ki dkhot jong ka Rajya Sabha kiba kynthup ïa u Sanjay Singh, Sandeep Pathak bad u Raghav Chadha, uba la don shabar na ka bynta ban phah sumar khmat, u Pankaj Gupta, ND Gupta, Gopal Rai, Atishi, Saurabh Bhardwaj, Kailash Gehlot ki la long kiwei pat na ki nongïalap ilekshon jong ka seng AAP. Ka thup kyrteng ka kynthup ruh ïa ki kyrteng jong ki Myntri ka Punjab kiba kynthup ïa u Harpal Singh Cheema, Aman Arora, Anmol Gagan Maan, Chetan Singh Jouramajra, Brahm Shankar Jimpa, Harjot Singh Bains, Balkar Singh, Harbhajan Singh ETO, Lal Chand Kataruchak bad u Baljit Kaur, u President jong ka seng hapoh ka jylla u Principal Budh Ram, Baljinder Kaur, Jasvir Singh Raja Gill, Taranpreet Singh Sond, Manjinder Singh Lalpura, Manjit Bilaspur, Sarabjit Kaur Manuke, Kulwant Pandori, bad Dr Inderbir Singh Nijjar.
