Kyiv, Jymmang:
Ka Ukraine ha ka Sngi Ba-ar ka la hap ban mad ia ka jingdum bad bun tylli ki shnong bad ki bynta ki la hap ban shong dum namar ka jingleit thombor jong ka Russia ia ki shlem pynmih bor-ding jong ka Ukraine ha katei ka sngi.
La ong ba ka Russia hadien katto katne bnai, ha kane ka sien ka la thmu ban thombor bad pynthut biang ia ki shlem treikam jong ka Ukraine khnang ban wanrah jingeh ia kane ka ri hapdeng ka jingiakhun thma pyrshah ia ka Russia da kaba leh buit-tuh ha katei ka rukom.
Kumta, la ong ba ki bor pyniaid ka Ukraine ki la pynbna ba na ki daw bym lah kiar kane ka ri ka hap ban pynshong dum ia baroh ki bynta naduh katei ka sngi katba ym pat lah ban pynbha biang ia kitei ki shlem kiba julor.
Wat la katta, ym pat lah ban tip haduh katno kane ka la ktah ia ka Ukraine baroh kawei hynrei ki bor pyniaid ka nongbah Kyiv ki la pyntip ba kumba 10% na ki longiing hapoh katei ka nongbah ki la duh bor-ding bad ki la hap ban shong dum naduh katei ka Sngi Ba-ar.
Katkum ki dur ba la saphriang ha ki rynsan ‘Social Media’ ruh la iohi ia ki bynta jong ka nongbah Lviv baroh kawei kiba la dum ngaiñ bad khlem iohi jingshai shuh.
