Geneva, Jymmang:
Ki pulit ka Zofingen ha ka Sngi Palei ki la iathuh ba uwei u briew u la pynmynsaw ia katto katne ngut ki briew ha ki surok ka thaiñ Shatei jong ka Switzerland ha Zofingen ha ka Sngi Balang. La ong ba utei u briew u don ia ka tari ha ka kti bad da katei ka tari kaba u la pynmynsaw bad thmu ban thombor ia kat kiba u iakynduh ha ka lynti iaid jong u ha katei ka sngi.
Ki pulit kim shym la ai jingkheiñ ne pynshai ia ka jingdon kiba ngat bad mynsaw ha katei ka jingjia lane ia ki jingtip bad ka kyrteng shaphang utei u briew uba leh ia katei ka kam thombor ha katei ka jingjia.
La ong ba utei u briew u la dung shuwa nyngkong ia uwei uba iaid lynti hajan ka stashon rel kaba don ha katei ka shnong Aargau Canton kaba don ia kumba 12,000 tam ki paid nongshong shnong bad kumba 60 Kilometre lane kumba 38 Mile na ka phang West jong ka Zurich.
Hadien kata, utei u briew u la dung bad pyn mynsaw biang sa ia katto katne ngut ki briew katba kiba u iakynduh ha ka lynti hashwa ba un leit rung noh sha kawei ka iing.
Hadien 2 kynta ba ki pulit ki la ioh jingtip shaphang katei ka jingjia, ki pulit ki la ioh ban kem noh ia utei u briew bad la ong ba utei u briew ialade ruh u la don ia ki dak mynsaw ha ka por ba ki pulit ki ioh bat ia u ha katei hi ka sngi.
