New Delhi, Jymmang:
Ka nongïalam jong ka seng BRS ka K Kavitha ha ka Sngi Balang ka la leit mih sha Delhi High Court na ka bynta ban kyrpad jamin ha kaba ïadei bad ka mukotduma pyrshah ïa ka halor ka jingkynnoh ba ka la donkti ha ka kam bamsap ha kaba ïa ka jingtohkit halor kane ka jingjia la tohkit haduh mynta da ka kynhun CBI ha kaba ïadei bad ka jingmih jong ka kam bamsap na ki rukom pyntreikam ha ka tnat Excise.
Hashwa kane, ka ïingbishar ha Delhi ha ka sngi Ba-ar ka la rai ban set patok ïa ka Kavitha haduh ka 20 tarik, Jymmang.
Ka nongbishar bakyrpang na ka bynta ka mukotduma ba la wanrah da ka kynhun ED bad CBI, ka Kaveri Baweja, ka la pdiang ïa ka hukum hadien ba ka Kavitha ka la wanrah hakhmat ka ïingbishar ïa ka jingkyrpad jamin ka bym treikam shuh ha kaba ïadei bad ka mukotduma kham hashwa.
Ka ïingbishar ka la buh ban bishar bniah na ka bynta ka 20 tarik, Jymmang ban ai hukum la yn pdiang ne em halor ka jingmudui ba la phah biang da ka Enforcement Directorate (ED) ha kaba ïadei bad ka jingjia.
Ha ka por ba la pynlong ïa ka jingbishar ha ka sngi Ba-ar, ka kynhun tohkit ka la ïathuh ha ka nongbishar ba ki la don ki sakhi kiba shisha ki ban kyrshan halor ka jingmudui, ka jingthmu jong ka kynhun ED ban mudui pyrshah ïa ka Kavitha ka long ban tohkit bniah ïa ka.
Ka kynhun ED ha ka sngi Thohdieng ka la buh jingmudui lajan 200 sla ha ryngkat ki jingmudui kiba la shah pynngat halor kiba bun ki kyndon jong ka Prevention of Money Laundering Act (PMLA).
Ka Kavitha, kaba long ka MLC jong ka seng Bharat Rashtra Samithi (BRS), lai ngut ki nongtrei jong ka kompeni kaba la pynïaid ïa ka jingïalap ilekshon jong ka seng AAP ha Goa ka Chariot Productions Media Pvt Ltd, kiba kynthup ïa u Damodar Sharma, Prince Kumar bad u Chanpreet Singh bad u nongtrei barim jong ka shlem pathai khubor ka India Ahead u Arvind Singh ki la shah buh kyrteng kum kiba la shah kynnoh ha ka jingmudui, la ïathuh ka tyllong khubor.
Ka kynhun tohkit, ka la kem ïa ka Kavitha, kaba dei ka khun jong u Myntri Rangbah barim jong ka Telangana u K Chandrashekar Rao, na ka ïingsah jong ka ha Banjara Hills kaba ha Hyderabad ha ka 15 tarik, Lber.
