Kolkata, Jymmang:
Ka seng Trinamool Congress (TMC) ha ka Sngi Ba-ar ka la ong ba u Amit Shah uba long u Myntri ka sorkar kmie uba dei khmih ïa ka tnat ki kam pohïing u la pynshisha da kaba ong ba ka seng BJP kan sa nang pynheh shuh shuh ha kaba ïadei bad ka jingtreikam jong ka skhim ‘Lakhsmir Bhandar’ sa kumba `. 100 kaba long ka jingñiew beiñ ïa ki long-kmie jong ka West Bengal.
Ka seng BJP ka la kyntait halor kane ka jingpynshisha bad kynnoh kylla ba ka seng TMC ka la ïalam bakla da kaba kren ïa kitei ki kyntien pyrshah ïa u Shah.
Ha ka jingai jingkren ha ka jingïalap ilekshon ha Uluberia kaba don ha Howrah distrik, u Shah u la ong, “ka Mamata Didi ka la ong ba lada ka seng BJP ka wan ha ka bor synshar, kan sa pynsangeh noh ha ka ban pyntreikam ïa kane ka skhim. Nga ïathuh ïaphi bad ka seng BJP kan ym pynsangeh ïa kane ka skhim. Ngin sa nang pynbha shuh shuh ïa ki jingai jingmyntoi ki ban wan lyngba kane ka skhim da kaba pynkiew `. 100.”
Ka Lakhsmir Bhandar ka dei ka skhim kyrshan pisa jong ka sorkar TMC, kaba pynbiang jingïarap pisa da `. 1,000 na ka bynta ki longkmie baroh bad `. 1,200 pat na ka bynta ki longkmie kiba shah kynthup ha ka Scheduled Caste bad Scheduled Tribe. Ïa kane ka skhim la pynbna hahswa ban pynlong ïa ka Assembly ilekshon 2021, ha kaba ka la long ka lad ka kabu na ka bynta ka seng TMC ban ïakren halor jong ka ha kiba bun ki ilekshon.
“Ym shym la kren wat tang shi kyntien ruh ha ki ar bnai ne mynta! Hato ka sorkar kmie ka la ai wat tang shi tyngka ruh na ka bynta ka s NREGA? Ne shi tyngka na ka bynta ka Awas hadien ba la shah kyntait ha ka ilekshon ha Bengal ha u snem 2021? Ka sorkar kmie ka la shim ram na ka jylla da `. 1.6 lak klur bad u Amit Shah u la ñiewbeiñ ïa ki longkmie jong ka Bengal da kaba tyrwa `. 100 kum ka jingpynbam tyngka. Ka long ka jing-lehraiñ,” la ong u nongïalam jong ka seng TMC ha Rajya Sabha u Derek O’Brien ha ka jingphah khubor jong u lyngba ka rynsan X.
