Shillong, Rymphang 16
U khlur ïalehkai phutbol ka ri u Sunil Chhetri ha ka Sngi Palei u la pynbna ban shongthait noh na ka kam ïalehkai bar ri hadien ba ka India kan pynkhreh ïa ka jingïalehkai jong ka FIFA World Cup (qualification) pyrshah ïa ka Kuwait ha ka 6 tarik u Jylliew.
Une u kapten ka kynhun ïalehkai ka ri u la pynbna ïa kane ka rai lyngba ka dur-khih kaba u la buh ha social media.
Une u rangïalehkai ba la 39 snem ka rta u la ïoh ban mihkhmat nyngkong ha ka lympung ïalehkai ri pyrshah ïa ka Pakistan ha ka 12 tarik u Jylliew jong u snem 2005 bad u la ïoh ban thep kol nyngkong na ka bynta ka India ha kane kajuh ka jingïalehkai.
“Kam dei ba nga la sngewthait ban ïalehkai. Hynrei ha kum kane ka por kaba nga biang pura ha ka rta jong ka kam ïalehkai nga la shim ba kane kan dei ka jingïalehkai kaba khatduh eh ïa nga bad kane ka dei ka rai kaba khatduh ei ïa nga,” la pynpaw u Chhetri ha ka dur-khih.
Ïa mynta u Chhetri u la long u ‘rang thep kol ba saw ha ka pyrthei baroh kawei (94 kol na 150 sien ïakhun) kata hadien u khlur ïalehkai ka Argentina u Lionel Messi (106 kol na 180 sien ïakhun) uba don hadien ïa u Cristiano Ronaldo (128 kol na 205 sien ïakhun) kaba une u khlur ïalehkai u la lah ban pynurlong na ka bynta ka Portugal.
Haba phai sha ka kam ïalehkai, u Chhetri u la long u rangïalehkai ba kynsai ha kaba u la ïoh ban khur ïa ka khusnam AIFF Player of the Year haduh hynriew sien, nalor ba u la ïohpdiang ïa ka khusnam Arjuna Award ha u 2011 bad ka Padma Shri ha u 2019.
Ha kane ka jingïaid lynti kaba 19 snem ha ka kam ïalehkai, u Chhetri u la ong, “Ha kane ka jingïaid lynti ka jong nga ha kine ki 19 snem nga ïoh mad ïa kiba bun hapdeng ka kam, ka jingïaleh bad ka jingkmen. Ha kiba bun ki lympung ïalehkai kiba nga la ïoh ban ïalehkai, nga la ïohmad ïa ki jingbha, ki jingsngewsih bad ki jingkmen.”
“Ha kine ki shibnai shiteng, ar bnai, nga la pyrkhat bha ïa lade ha shwa ba ngan shim ïa kane ka rai ban shongthait noh na ka kam ïalehkai bar ri bad kane ka jingïalehkai kan dei kaba khatduh eh ïa nga.”
Ha ka jingïaid lynti jong u ha ki jingïalehkai na ka bynta ka ri, u Chhetri u la ïadon bynta ban rah ïa ka nam lahduh ha ka AFC Challenge Cup ha u 2008, ka SAFF Championship ha u 2011 bad 2015, ka Nehru Cup ha u 2007, 2009 bad 2012, kumjuh ha ka Intercontinental Cup ha u 2017 bad 2018.
Ha kane ka jingïalehkai kaba khatduh jong u Chhetri na ka bynta u bnai ban wan, ka India ka la don ha ka kyrdan ba-ar ha ka Group-A jong ka FIFA World Cup (qualifying) ha kaba ka la kamai 4 point, kata hadien ka Qatar kaba dang lamkhmat, katba ka Kuwait ka la don ha ka kyrdan basaw bad 3 point.
