Shillong, Rymphang 16
Ka Meghalaya ka la duh noh ïa ka lad ban jam sha ka quarter final wat la ka la lah ban pynliem ïa ka Maha-rashtra da 2-0 kol ha ka jingïalehkai kaba khatduh jong ka lympung U-20 Men’s National Football Championship ha ka Sngi Palei ha Narainpur kaba ha Chhattisgarh.
Kane ka jingbym lah ban pynthikna ka la wan hadien ba ka Mizoram ka la lah ban pynliem noh ïa ka Rajasthan haduh 7-0 kol bad ka la ïoh ban bat ïa ka kyrdan ba hakhlieh jong ka Group-F.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang, ha kaba ka Meghalaya ka la ïoh ban pynkhih jar nyng-kong eh lyngba ka penalty ba la shut da u Mebanaibok Kharbudnah ha ka minit kaba 26. Kane ka shi kol ka la nang pynïoh mynsiem ïa kane ka kynhun ïalehkai hapoh ka jingïalam u Bah Jeffrey Warlarpih.
Hadien katto katne por ba la bteng biang ïa ka jingïakhun jong ka kylla miet, ka Meghalaya ka la ïoh ban thep biang ïa ka kol kaba ar lyngba u Ïashanbok Buhphang ha ka minit kaba 82. Haduh kaba kut ka jingïalehkai ka Maharashtra kam shym la lah ban pynphai bad ka la mad ïa ka jingshah rem. U Wanshwadame Diengdoh u la ïohpdiang ïa ka nam Player of the Match.
Lyngba kane ka jingjop ka Meghalaya ka la kamai 6 point na ki lai sien ïakhun ha kaba kham hashwa ka la jop ïa ka Rajasthan da 3-2 kol, hynrei ka la shah rem noh ha ka Mizoram da 5-0 kol ha ka jingïalehkai ba nyngkong. Katba ka Mizoram kaba bat ïa ka kyrdan ba hakhlieh duh na kane ka group da kaba kamai 9 point na baroh lai sien ïakhun. Ka Rajasthan ka la wan balai da kaba kamai 3 point bad ka Maharashtra (0 point) ka la wan ha ka kyrdan basaw.
