Shillong, Rymphang 17
Ka lympung ïalehkai State Level Inter School Athletic Meet (SLISAM) 2024 ban pynïaid da ka tnat ïalehkai jong ka Sorkar Jylla kan sdang noh naduh 22 tarik mynta u bnai ha shlem ai jinghikai jong ka S.A.I Training Centre, Shillong.
Kane ka la wan hadien ba baroh ki shlem treikam jong ki District Sports Officer (DSO) ki la lah ban pynlong ïa ki lympung ïalehkai District Level Inter School Athletic Meet 2024 ha baroh 12 tylli ki district.
Ha kane ka lympung ïalehkai ka ban neh haduh lai sngi kynthih, la phai ha ki lai tylli ki kyrdan ïalehkai ka Under-14, Under-16 bad Under-18 ha ka liang ki shynrang bad kynthei. Ki jingïalehkai ki ban pynlong ha kane ka lympung ki kynthup ïa ki jingïakob mareh bapher bapher, kumjuh ka jingkawang sum (Javelin), Shot Put, Discus Throw, High Jump, Long Jump bad kiwei kiwei.
Lah ban pynkynmaw ha ka State Level Inter School Athletic Meet mynshem snem, ka West Jaiñtia Hills ka la ïoh ban bat ïa ka nam lahduh hadien ba ka la lah ban khur 14 tylli ki takma ksiar, 6 ki takma rupa bad 3 ki takma rnong. Ka Ri Bhoi District ka la wan ba-ar ha kaba ka la khur 11 tylli ki takma ksiar, 8 ki takma rupa bad 13 tylli ki takma rnong. Ka West Khasi Hills ka la wan balai da kaba khur 8 tylli ki takma ksiar, 6 ki takma rupa bad 11 ki takma rnong.
Haba phai sha ka East Khasi Hills kaba la biang nadong shadong ha ka jingdon ïa ki jaka ïalehkai ba paka, ka la wan haduh ka kyrdan ba hynñiew da kaba khur 5 ki takma ksiar, 4 ki rupa bad 6 tylli ki takma rnong. Kumta ka jingkylli ka long mano ban rah ïa ka nam lahduh mynta u snem?.
