Washington, Jymmang:
Ka iing dorbar ki Myntri jong ka United States ha ka Sngi Palei la ong ba ki la wanrah ia ka aiñ ban pynbor ia u President ka US u Joe Biden ba un phah ia ki tiar iakhun thma sha ka Israel bad ban ai jingkyrshan ia ka Israel haba iadei bad ka jing-leit hiar thma sha nongbah Gaza jong ka Palestine.
Kumta, la ong ba kane ka khubor ka la pynkyndit ia kiba bun ki nongialam jong ki tnat bad ki ri bapher bapher namar kumba la iohi hi, na ka liang u President ka US u la ialeh ban kyntu bad maham ia ka Israel ba kam bit ban pynthut ia ki paid nongshong shnong ba lui-lui jong ka Gaza bad ba ka dei ruh ban sangeh noh ia ki jingthmu jong ka ban leit hiar thma ia ka nongbah Rafah jong ka Gaza. Na ka liang ka Israel ka ngeit ba bun na ki dkhot bad ki heh nongialam ka Hamas ki don ha katei ka bynta jong ka nongbah Gaza bad kumta ruh ka Israel ka thmu ban leit hiar thma khatduh ia katei ka bynta khnang ba kan ioh ban phah synshar hi noh da ki shipai lade ia ka nongbah Gaza kumba ka la thmu naduh kaba sdang jong ka jingleit kput ia ka Gaza.
Nalor nangta, la ong ba ki la don 224 ngut ki Myntri sorkar bad ki heh ka US kiba la ai jingkyrshan ia katei ka aiñ ha katei ka sngi. Katba 187 ngut pat ki dei kiba la pyrshah ia katei ka jingdawa jong kitei kiba bun ia ka US ba ka dei ban ai jingkyrshan ia ka Israel.
Wat la ia katei ka aiñ ym shym la khmih lynti ba yn lah ban pyntreikam shisha, hynrei la sngewthuh ba kiba bun hi ki heh nong-ialam bad ki Myntri ka ïingdorbar thaw aiñ ka US, ki kwah ban ai jingkyrshan ia ka Israel haba iadei bad ka jing-leit hiar thma bad ka jingleit kput jong ka Israel pyrshah ia ki lehnoh Hamas kiba synshar ia ka nongbah Gaza da ki phew snem mynta namar ka jingleh jong kitei hi ki lehnoh ia ka Israel ha ka 7 tarik u Risaw jong u snem 2023 ba la leit.
Ki bor pyniaid ka Palestine ki la pyntip ba ka jingïap jong ki briew hapoh Gaza ka la kiew sha ka 35 hajar tam mynta ba ka thma ka la neh la bun bnai. Kumjuh ruh la pyntip ba ki dawai-dashin bad ki lad jingsumar baroh ki la sdang ban kyrduh namar ki jingeh kiba la wan lynshop ia ka Gaza namar jong ka jingleit hiar thma ka Israel sha Gaza.
