Shillong, Jymmang 17
U Myntri ka tnat ïalehkai u Bah Shakliar Warjri u la pynpaw ba ïa mynta ka Sorkar Jylla kam pat lah ban leh eiei ïa u rangapkol uba na Mawryngkneng, u Samborlang Rynjah namar ba ka dang don ka Model Code of Conduct (MCC) jong ka Election Commission of India.
Haba ïakren sha ki lad pathai khubor ha ka Sngi Thohdieng, une u Myntri Sorkar u la ong ba na ka liang jong u shimet u la ïoh ban ïakynduh ïa ki bahaïing bahasem lem bad ïa u Samborlang uba dang ha ka rta kaba 6 snem ha ka taiew ba la lah hadien ba ki la wan ïakynduh ïa u hapoh ka shlem treikam.
“Na ka liang ki bahaïing bahasem bad u Samborlang ki la wan ïakynduh ïa nga, hynrei ïa mynta na ka liang ka Sorkar kam pat lah ban leh eiei namar ka dang don ka Model Code of Conduct jong ka Election Commission of India.”
U la pynpaw ba na ka liang ka Sorkar Jylla ka don ïa ka jingthrang bad jingangnud ban ai jingïarap ïa utei u heprit khnang ba un nang lah ban pynbha bad pynjanai ha ka kam ïalehkai ha ki sngi ki por ki ban nang wan namar ka jingangnud ka jong u Samborlang ka long ba un long kum u khlur apkol ka Argentina u Emiliano Martinez ha ka lawei ka ban wan.
Lah ban pynkynmaw ka jingpaw jong utei u heprit uba dei u khun ba-ar jong i Kong Kyntiewlang Rynjah bad Bah James Sunn kiba na Mawryngkneng, ka dei lyngba ka saphriang ka video jong u ha ki rynsan social media. Kine ki video ki jong u ki la poi shaduh u khlur apkol ka Argentina, u Emiliano Martinez. Kumta na ka liang une khlur apkol uba la ïohpdiang ïa ka khusnam Golden Gloves ha ka FIFA World Cup 2022 kaba la long ha Qatar, u la buh ïa katei ka video jong utei u heprit hapoh ka sla ‘instagram’ ka jong u bad dei hangne ba da ki million ngut ki briew kiba la sakhi ïa katei ka sap ba kyrpang jong utei u heprit.
Wat la ki la don bun ki klob kiba la pyrshang ban ïoh ïa u, hynrei na ka liang ki bahaïing bahasem lem bad ka kur Rynjah ki la rai ban phah ïa u Samborlang sha ka shlem ai jinghikai phutbol jong ka Minerva Football Academy kaba don ha Punjab.
Na ka liang ki bahaïing bahasem baroh ki la kwah ban phah lang bad uwei u hynmen arkmie (Banshai-lang Rynjah) sha Punjab khnang ba u Samborlang un ym sngewpher haba u don jngai na la ka kmie u kpa bad ki bahaïing bahasem.
