Ranchi, Jymmang:
U Myntri jong ka Jharkhand u Alamgir Alam uba dang shen u la shah kem ha ka kynhun Enforcement Directorate ha kaba ïadei bad ka jingtohkit halor ka jingdon ka jingjia jong ka jingkamai ïa ka spah bymhok, ha ka Sngi Palei u la shah rai ba un hap ban shah set na ka bynta 6 sngi ban pynlong ïa ka jingtohkit bniah ha ka ïingbishar bakyrpang jong ka PMLA.
Ka kynhun ED ka la dawa ban set ïa u Myntri kumba 10 sngi na ka bynta ka jingtohkit.
U nongïasaid aiñ jong u Alam u Kishlay Prasad u la ong ba ka jingtohkit ïa u ha kine ki 6 sngi ka la sdang naduh hynnin ka sngi.
“Mynta ruh u dang shah set. Kam shym la don kano-kano ka jingkynnoh ban pynshisha ïa ka jingdonkti jong u Alam ha kane ka kam beaiñ. Kumba la lap, la ong ba kim pat paw shai halor ka jingdon-kti jong u ha ka kam beaiñ hynrei mynta ka jingtohkit kan ïai bteng. Ka kynhun tohkit, kam pat buh ïa ki kyrteng jong ki briew kiba la shim ne kiba la pyntreikam ïa ka pisa ha kaba ïadei bad ka jingjia. Kam pat paw shai ka jingdonkti jong u Myntri. Ïa ka pisa ba bun la ïoh ban kurup na uwei u briew ba la tip kyrteng kum u Jahangir u bym don jingïadei ne don bynta ei ei bad u Alamgir Alam,” la ong u Prasad.
U nongïasaid aiñ jong u Alam u la pynpaw halor ka jingbym shait bym khlaiñ jong une u Myntri uba la 70 snem ka rta ha ka ïingbishar, ha ka por ba u la pyrshah ïa ka jingdawa set patok jong ka kynhun ED. “
U ju don ïa ka jingshitom kaba u ju duh ka bor ring mynsiem ha ka por ba u ïohthiah (Sleep apnea), namar ka ju don ka jingduna ka bor ring mynsiem ha ka por miet. Namar kane ka daw u la hap ban ïoh jingkyrshan na ka tyndong lyer ban ring ban pynhiar mynsiem. Ïa ka tyndong lyer la pynbiang da ki bahaïing jong u Alam na ka bynta ka jingshah set jong u ban shah tohkit ha ka kynhun ED. U shah ktah ruh na ka BP bad ka jingpang shini,” la ong u Prasad.
Ka ïingbishar ka la dep ong ba yn sa pynbiang ïa baroh ki jingsumar kumba u dei ban ïoh ha kane ka por ba u dang shah set na ka bynta ka jingshah tohkit, u la ong.
