Shillong, Jymmang 17
Ka lympung ïalehkai kriket ki kynthei ba la tip kum ka Women’s League ba la pynïaid da ka Shillong Cricket Association ka la bteng biang ha ka Sngi Thohdieng ha kaba ka EWDCA ka la jop ïa ka SWKDCA da 51 run.
Ha kane ka jingïakhun kaba la long ha madan Polo, ka EWDCA ka la kam trai ban tied nyngkong ha kaba ka la kamai 103 run bad shah pynhap 9 wiket ha ki 15 over. Ka Monycable Marbaniang ka la tied 20 run na ki 34 bol. Katba ka Ibajanai ka la shim 2 wiket ha ki 2 over na ka bynta ka SWKDCA.
Haba wan beh ïa ka thong, ka SWKDCA ka la lah ban kamai tang 52 run bad shah pynhap 6 wiket. Ka Rebeldalis ka la tied 30 run na ki 39 bol. Katba ka Nerisa ka la shim 2 wiket na ki 2 over na ka bynta ka EWDCA. Ïa ka nam Player of the Match la khur da ka Monycable.
