Shillong, Jymmang 17
U rangapkol ka Manchester City u Ederson um lah ban ïadon bynta ha ka jingïalehkai kaba khatduh jong ka Premier League ka ban long ha ka Sngi U Blei bad kumjuh ha ka final jong ka FA Cup, la pynbna kane ka klob ha ka Sngi Thohdieng.
Une u rangapkol u la mynsaw ha ki bynta jong ka durkhmat ha ka jingïakhun kaba la dep jong ka City kaba la jop da 2-0 kol ïa ka Tottenham, ha kaba la hap ban pynmih bujli noh da uwei pat u rangapkol.
Kat kum ka jingbishar bnai la paw ba ka la don ka jingpait ha ki bynta ka durkhmat sha kamon hadien ba u la ïatyngkhuh bad u Cristian Romero.
Kumta u Ederson un ym lah ban ïadon bynta bad ka kynhun ha ki jingïakhun kiba kham kongsan pyrshah ïa ka West Ham bad kumjuh ha ka final jong ka FA Cup pyrshah ïa ka Manchester United ka ban long ha ka taïew ka ban wan ha Wembley.
“Ka Manchester City ka lah ban pynthikna ba u Ederson un duh ïalehkai ha kitei ki ar tylli ki jingïalehkai na ka daw ka jingpait kaba khyndiat ha ki bynta jong ka durkhmat,” la pynpaw kat kum ka kyrwoh ba la pyllait da ka City.
Kumba ka paw ka City ka dangbat ïa ka kyrdan ba hakhlieh ha ka Premier League hadien ba ka la tam da 2 point ïa ka Arsenal. Tangba, lada ka jingjop ïa ka West Ham ha Etihad kan pynlong ïa kane ka kynhun ban rah biang ïa ka nam lahduh ha kane ka aïom.
Wat la u la pyrshang ban bteng ïa ka jingïalehkai pyrshah ïa ka Spurs hadien ba u la ïoh ka jingsumar na katei ka jingmynsaw, hynrei u Ederson u la shah pynshong noh ha u manager u Guardiola ha ka kylla miet.
Kumta u Stefan Ortega u la ïoh ban mih bujli ha ka jaka jong u ha ka minit kaba 69 bad u la lah ban ïalehkai bha na ka bynta ban khanglad ïa ki jingpyrshang u Son Heung-min bad ban pynlong ïa ka City ban khur syndon ïa ka jingjop.
Mynta u Ortega un ïoh ïa ka lad ban pyni ïa ka jingtbit ka jong u ha katei ka jingïalehkai kaba khatduh jong ka Premier League bad kumjuh ha ka FA Cup.
