Imphal, Jymmang:
Ki nongrep sohtrun ha Ngarian, ka shnong kaba hap hapoh ka Imphal East distrik, ki la pynpaw ba ki la shah ktah jur na ka jingwan hap jong u slap ba dang shen bad ka jingwan lynshop jong u phria, ha kaba kane ka la pynjulor lut ïa ki jingthung jingtep baroh.
Namar ka jingduhnong kaba khraw kaba ki la ïohmad na kane ka jingwan thombor ki bor ka mariang ïa ki mar rep jong ki, kine ki nongrep ki la dawa na ka sorkar jylla ba ka la dei ban phai khmat sha ki ban ba ai ki jingïarap bad ki jingkyrshan khnang ba kin lah ban khie khlieh biang sa shisien.
Na ka liang ka kynhun jong ki nongrep ka la pynpaw ïa ka jingduhnong kaba khraw halor ka jingwan thombor jong u slap uba jur uba la neh da bun sngi bad kumjuh halor ka jingwan hap ryngkat jong u phria ha kiba bun ki jaka.
Ki nongrep ha kaba ïadei bad kane ka jingïakynduh jingeh ki la shaniah beit tang na ki jingïarap jong ka sorkar ha kaba ïadei bad ka jingwad ïa ki lad ki lynti ban pynbiang ïa ki jingduhnong jong ki namar ka jingjulor jong baroh ki jingthung jingtep ha ki lyngkha ba rep ïa ki soh bad ki jhur.
Ka kynhun jong ki nongthoh khubor dang shen ki la leit ban jurip bniah ïa ka shnong Thayon Kom bad ka Thamaram Tangkhul kiba don ha Ngarian na ka bynta ban ïakren bad ki nongrep kiba la shah ktah jur. Kum ka jingsakhi halor ki jingpynjulor, ha ka lyngkha ba rep ïa ki sohtrun ha ka shnong Thamaram Tangkhul, ka kynhun jong ki nongthoh khubor ka la pynshisha halor ka jingduhnong bad ka jingeh jong ki nongrep.
