Shillong, Jymmang 19
Ka Indian Kayaking Canoeing Association (IKCA) ka la pynlong ïa ka ‘trial’ ne ka jingjied ïa ki nongkieng lieng kynda ha Meghalaya ïa kaba la pynlong ha ka 18 bad 19 tarik mynta u bnai.
Kane ka jingjied ka long kaba donkam na ka bynta ban ïoh ïa ka kynhun ka India ban ïakhun na ka bynta ka 2024 ICF Canoe Slalom World Cup and Kayak Cross events, bad ruh ban pyrshang ban ïoh rung sha ka Paris 2024 Olympic Games.
Palat 25 ngut ki nongïalehkai na kylleng ka ri India, kynthup ruh ïa ka kynhun ba khlaiñ na Madhya Pradesh, Karnataka bad Meghalaya ki la ïashim bynta shitrhem.
Kane ka jingïakob ka la pynpaw ruh ïa ka jingkiew jong ka Meghalaya ha kane ka jingïalehkai jong ka jingïakob kieng lieng kynda, bad ruh kaba lah ban pynlong ïa ki jingïakob baheh.
Haba phai sha ka jingïakob, kata ha ka K1 Women’s Category, ka Elizabeth Vincent na Meghalaya ka la wan ba-lai bad ha ka Kayak Cross pat ka Elizabeth Vincent ka la wan ha ka kyrdan ba nyngkong.
Ha ka K1 Men’s Category, u Batskhem Nongbak u la pyndep ha ka kyrdan kaba 6, u Pynshngaiñ Kurbah ha ka kyrdan kaba 8, u Manbhalang Kharkrang ha ka kyrdan kaba 9. Ha ka C1 Men’s Category pat u Indra Sharma na Meghalaya u la pyndep ha ka kyrdan kaba 6.
Kine ki nongïalehkai mynta kin mihkhmat pat ïa ka India ha ki lym pung ka pyrthei, da ka jingthmu ban ïoh rung pat sha ka Canoe Slalom events ha ka Paris 2024 Olympics.
Ka jingpynlong ïa ka trials jong ka 2024 ICF Canoe Slalom World Championships ka long shisha ka jingjop ba khraw ïa ka Meghalaya, ha kaba ka la lah ban pynpaw ïa ka jinglah ban pynlong ïa ki lympung kiba heh bad ka jingdon ka mynsiem ban kyntiew ïa kane ka jingïalehkai.
