Shillong, Jymmang 19
Ka Meghalaya Football Association (MFA) ka la dep ban pynlong ïa ka screening ne ka jingbishar ïa ka rta ïalehkai ki khynnah ha ki Zones ka ban pynlong ïa ki jingïalehkai ka ‘group stage’ jong ka lympung Meghalaya State Youth League.
Kane ka lympung, kaba dei ruh ka jingangnud kaba la slem bha jong ka Association, yn phiah ha ki ar tylli ki bynta, kata ha ka U-14 Boys bad U-16 Boys. Ki jingïalehkai ha ki Zone kin long ha West Garo Hills, West Jaiñtia Hills, West Khasi Hills bad ha East Khasi Hills ka ban pynlong ha ka rukom ‘home and away’ ha kaba ki kynhun kin hap ban ïakhun ar sien, kawei ha la ïing bad kawei shabar bad hadien kane, yn pynbud da ka quarter-final, semi-final bad ka final ban wanrah ïa kane ka lympung sha ka jingpynkut kaba biang bad paka tam.
Kane ka lympung ban pynlong da ka MFA ha baroh kawei ka jylla kan nym long satia hapdeng ki club hynrei kan long hapdeng ki district association kiba ïateh bad ka MFA, ha kaba ha kane ka lympung kaba nyngkong kin don haduh 20 tylli ki kynhun ki ban ïashim bynta ban knieh ïa ka nam lahduh.
Ka jingthmu ba kyrpang jong ka jingpynlong ïa kane ka lympung ka long ban pyndonkam kum ka rynsan na ka bynta ban jied ïa ki khynnah ïalehkai kiba tbit ki ban mihkhmat pat ïa ka Meghalaya ha ki kyrdan National.
Kane ka lympung kan plie ruh ïa ka lad ka lynti na ka bynta ki khynnah ïalehkai ban jam pat sha u mawjam ban ïoh rung sha ka senior team bad ruh sha ki club bapher bapher bad ban pynlong pat ïa ka Meghalaya ban khlaiñ biang sa shisien ha ka kam ïalehkai phutbol hapoh ka ri.
Ïa kane ka jingbishar ïa ka rta jong ki khynnah la pynlong da ka MFA ha rilum Garo ha ka 14 tarik mynta u bnai bad kumjuh ha ki lai tylli ki Zones ha ka sngi Saitjaiñ.
Ha kaba ïadei bad kane ka lympung, na ka liang jong ka Association ka don ka jingkyrmen ba kan sa lah ban buh ïa ka tarik ha u bnai Jylliew bad ha kaba ïa ki jingïalehkai yn pynlong beit ha ki sngi Saitjaiñ khnang ba kan nym ktah pat ïa ka pule puthi bad ka skul jong ki khynnah ïalehkai.
