Shillong, Rymphang 19
Ka Upper Shillong Sports Social & Cultural Association (USSS&CA) ka la sdang ïa ka lympung ïalehkai phutbol ki khynnah hapoh 15 snem ka rta ba la tip kum ka 14th AS Khongphai Memorial Football Tournament 2024 ha ka Sngi Saitjaiñ ha madan Nongumlong.
Ïa kane ka lympung la plie da u President jong kane ka Synjuk, u Bah E Kharkongor kum u kongsan ha ryngkat ka jingïadon lang u Secretary ka shnong Nongumlong u Bah Shephard Kharsahnoh kum symbud kongsan kumjuh u General Secretary katei ka Synjuk u Bah Richard Nongneng bad kiwei bad la pynïaid ïa kane ka jingïalang plie da u Vice President u Bah BN Shanpru.
Haba ai jingkren ha kane ka sngi, u Bah Shephard u la pynpaw ka jingsngewkmen ba ka Upper Shillong Sports Social & Cultural Association ka la wan ban pynlong biang ïa kane ka lympung hapoh ka shnong Nongumlong bad kum ka shnong ka pdiang sngewbha ïa kane ka lympung ïalehkai. U la pynpaw ba ha kane ka jingïaid lynti katei ka Synjuk ban pynlong ïa katei ka lympung ïalehkai AS Khongphai, ki la mih bun ki nongïalehkai kiba paw na ka thaiñ Upper Shillong bad u la khmih lynti ba kan nangjam shaphrang na ka bynta ban sei shuh shuh ïa ki nongïalehkai ha ki snem ki ban wan.
Ha kawei pat ka liang u Bah E Kharkongor u la pynpaw ba ha ki snem kiba la leit ka jingmih ki Synjuk ïalehkai bad ki klob ki la long kum ki tit na Upper Shillong, hynrei dei tang ka Upper Shillong Sports Social & Cultural Association kaba la lah ban pyntyllun ïa ki kam ki jam na ka bynta ban saiñ dur ïa ka lawei ki khynnah bad mynta ka la kynjoh 20 snem lyngba ka jingtrei shitom da baroh ki nongkitkam.
Haba phai sha ki jingïalehkai sdang ha kane ka sngi plie, ka Nongumlong Sports Club ka la pynliem noh ïa ka Pyrda Football Club da 2-0 kol, kumjuh ka Nongpiur Sports Club ka la jop da 2-0 kol ïa ka Doccan Football Club bad ka Umlyngka Sports Club ka la pynliem noh ïa ka RIH Football Club na Lumpdeng da 1-0 kol.
