Dubai, Jymmang:
Ki bor pahara ka Iran ha ka Sngi Thohdieng ki la pyntip ba ki la ioh ban bat noh ia kumba 260 ngut ki briew kiba kynthup ia 3 ngut na ka thaiñ Europe katba kiba dang ialum lang shi jaka ban mane ksuid hapoh ka nongbah Tehran jong katei ka ri.
Katei ka jingleit khynra jong ki bor pahara ka Iran ka long hadien ba ki bor pyniaid ki la bna halor ka jingleh pyrshah jong ki kynthei hapoh katei ka ri ba kim shym kohnguh ne bud shuh ia ki kyndon ba la pyrkhing na ka bynta jong ki khamtam haba iadei bad ka rukom riam jong ki kynthei kumba ju riam ki jaitbynriew Muslim.
Kumta, la ong ba ki bor pyniaid ka Iran ki la ioh ban tehlakam noh ia katei ka jingmane ksuid jong kitei ki paidbah kiba ialum ha katei ka jaka ha ryngkat ka jingiadon bynta lang jong kitei 3 ngut ki nong Europe ha katei ka sngi.
Napdeng jong kitei kiba la shah kem baroh, 146 ngut ki dei ki shynrang bad 115 ngut pat ki dei ki kynthei. Nalor kata, la ioh kurup ruh ia ki jingdih pynbuaid naduh ka kyiad bad ki drok kiba la pyndonkam bad thmu ruh ban pyndonkam da kitei ki nongmane ksuid ha katei ka por.
Kumjuh ruh na ka liang ki lad pathai khubor, ki la pyllait ia ki dur ba la ioh shon na katei ka jaka, ha kaba la iohi ia kitei ki paidbah kiba phong ia ki jaiñ iong bad kiba deng ruh ia ki durbula kum ki dur ksuid lane dur shynrong khlieh ha ryngkat ruh bad ki sopti kiba don ia ka dur shynrong khlieh .
