Kabul, Jymmang:
Ki bor pyniaid ka Afghanistan ha ka Sngi Saitjaiñ ki la pyntip ba 3 ngut ki bar ri bad uwei u nong Afghanistan ki la khlad ha ka jingjia synreit kuli ha ka thaiñ Bamiyan jong ka phang pdeng katei ka ri kaba la jia ha ka Sngi Thohdieng.
U Myntri ka tnat kam poh iing ka Afghanistan- u Abdul Mateen Qani ha katei ka step u la pyntip ba katei ka la jia ha ka janmiet Sngi Thohdieng hapoh ka nongbah Bamiyan.
Nalor jong kitei kiba khlad, 4 ngut kiwei pat ki bar ri bad 3 ngut ki nong Afghanistan ki dei kiba la ngat bad mynsaw lang na katei ka jingjia, hynrei ki bor pyniaid ka Afghanistan kim shym la pynshai ia kitei ki bar ri ba ki dei ki nongshong shnong jong ka ri aiu ruh.
Kumta, la ong ba ki bor pyniaid ki la pyntip pat ba ha katei ka jingjia ki la ioh bat noh ia 4 ngut ki suba don kti bad ka jingtohkit kan dang iaid sha khmat tad haduh ban da lap ia kiba suh buit bad ia ki jingthmu jong katei ka jingjia ha katei ka sngi.
Hynrei u Qani um shym la pynshai la ki don bun ne kumno ruh kitei ki nong-siat ha katei ka jingjia.
Uwei na ki paidbah nongshong shnong na katei ka thaiñ bad u bym shym la kwah ban pynpaw kyrteng, u la iathuh ba ha katei ka sngi u la ïohsngew ia ka jingriew ki ktang suloi ha kitei ki bynta jong ka surok bad tang kumta hi la iohi ia ki bor pahara ki la sop ia katei ka thaiñ baroh kawei ban tehlakam mar-mar ia katei ka jingjia khlem da pynslem.
Hynrei la ong ba ym lah pat ban pyntikna la kitei kiba leit thombor ha katei ka jingjia ki don jingiadei ne em bad kano- kano ka kynhun lehnoh.
Ka Bamiyan, ka long ka thaiñ kaba don bun ki jingtei ‘Buddha’ ia kiba la um bad julor lut ha ka jingthombor bad ki jing pynbthei bom jong ki lehnoh Taliban naduh ki snem 2001 namar katei ka thaiñ ka long ruh ka bynta kaba iaid bha naka bynta ka kam jngoh kai bad kam shang kai pyrthei.
Hynrei ka jingshah thombor ki bar ri hapoh Afghanistan ka la hiar bad kham ju kham jia koit naduh ba ka Taliban ka la ioh ban synshar hi ia katei ka ri naduh u Nailar jong u snem 2021.
Kumta, na ka liang ki bor pyniaid ka Afghanistan bad kiba long ruh ki heh ka Taliban, ki la pynrem jur halor katei ka kam thombor bad ka Taliban ka la phah ruh ia ka jingsngewlem sha ki iing- ki sem jong kitei kiba khlad bad mynsaw ha katei ka jingjia bad ka la kular ruh ban shim khia bad ban pynshitom ia kitei kiba don kti ha katei ka kam baroh.
