New Delhi, Jymmang:
Kumba la sakhi, na ka durkhih kaba thymmai kaba la saphriang na ka ïingsah jong u Myntri Rangbah jong ka Delhi u Arvind Kejriwal, ka la pyni ba ka Swati Maliwal ka la shah ïalam ha ka pulit kynthei bad ki pulit ïada.
Kane ka jingjia ka la jia ha ka Lah Sngi U Blei kaba dei kajuh ka sngi ha kaba kane ka MP jong ka seng AAP ka la kynnoh ba ka la shah ktah kti bad shah thombor ha u nongïarap jong u Myntri Rangbah u Bibhav Kumar.
Ha ka jingujor ejahar, ka Maliwa ka la pynshisha da kaba ong ba ka la shah ktah kti bad shah leh tohmet ha u Bibhav Kumar haba ka la leit sha ka ïingsah jong u Myntri Rangbah.
Ka la kynnoh ba ka la shah kynjat na ki bynta ka kpoh bad trai kpoh, shah kura bad shah pyndonkam bakla ha u Kumar, uba long u Personal Secretary jong u Kejriwal.
Ka Maliwal ka la ong ruh ba ka la shah tar ki jaiñ phong jong ka, bad ka la shah pynmynsaw jur na ki bynta jong ka khlieh bad ka kjat jong ka.
Hynrei kumba ka la paw ha ka CCTV, ka Swati Maliwal kam shym la long kumba ka la pynshisha ba ka la shah pynmynsaw, la ïohi ba ka la shah ïalam ha ka pulit kynthei bad la ïohi ba ka la pyllait hi ïa ka kti jong ka na kane ka pulit.
Ka nongïalam jong ka seng AAP ka Atishi ka la kynnoh ba ka Maliwal ka la ïasuhbuit sniew bad ka seng Bharatiya Janata Party na ka bynta ban pynjah burom bad thom da ka bor ïa ka seng ha kane ka por ba don ka ilekshon.
Kane ka jingjia ka la wanrah ïa ki kynrum-kynram ha kaba ïadei bad ki kam saiñ pyrthei.
Na ka liang ka seng BJP hashwa kane ka la kynthoh jur ïa u Kejriwal ba u la shu sngap halor kane, ha kaba u nongaiktien u Gaurav Bhatia u la pynkam ba u Kejriwal u la dei uwei na ki runar namar ka jingbym ai hukum jong u ban leh ei ei ha kaba ïadei bad ka jingshah thombor jong ka Maliwal.
