Guwahati, Jymmang:
Ki la don kumba 12 ngut ki briew kiba la shah pynkit sha ki jaka ai jingsumar ha Tinsukia distrik jong ka Assam ha ka Sngi Thohdieng namar ba ki la ngat bih na ka jingbam ïa u ‘ñiang ryndia.
Kine ki nongpang kiba dei na ka shnong Roborguri Sonowal kaba hap hapoh Tinsu distrik jong ka Assam, ki la bam ïa kine ki khñiang ba la tip kum ki Polu, ha kaba ki la sngew shitom hadien kane.
Kumba la ïathuh ka tyllong khubor la ong ba kine ki briew hadien ba ki la dep ban bam ïa une u khñiang ki la prie, ud king khlieh, tlot, mih ‘ñiangdait ha ka met. Hadien ba la lap ïa kane la pynkit mar mar ïa kine ki briew sha kiba bun ki jaka ai jingsumar, kynthup ha Phillobari Model Hospital, Doomdooma First Referral Unit, bad Tinsukia Civil Hospital, na ka bynta ka jingsumar kaba kyrkieh. Hadien kane ka jingjia, ki nongsumar ki la kyntu ïa ki briew ba ki la dei ban khmih bniah bha shwa ban bam ïa kine ki jait khñiang bad ban pyntikna ba kin long kiba bit bad ym don jingktah ei ei lada ki bam.
“Man u snem, ngi ju ïoh sumar ïa ki briew kiba ïohbih na ka jingbam ïa kine ki khñiang bad mih khñiang ha ka met, bad kine ki la donkam ban phah sumar kloi. Ka jinglong bih jong kum kine ki jait khñiang ka long namar ba kine ki khñiang ki bam ïa ki jingbam ba la ai dawai ne ba la bit ki dawai pynïap khñiang ha ki,” la ong uwei na ki doktor.
