Shillong, Jymmang 19
Ka Manchester City ka la kylla long ka klob ba nyngkong ha ka lympung Eng-lish Premier League ba kan jop bad rah ïa ka nam lahduh jong kane ka lympung haduh saw sien kynthih.
Ka jingïoh rah biang ïa ka nam lahduh ka la wan ruh hadien ba ka Man City ka la pynliem noh ïa ka West Ham United da 3-1 kol ha ka jingïalehkai ba khatduh jong kane ka aïom kaba la long ha Etihad Stadium.
Ka rai na ka bynta ban ïoh ïa ka kynhun ka ban rah ïa ka nam lahduh jong kane ka lympung ka la poi shaduh ka jingïalehkai ba khatduh hapdeng ka Man City bad Arsenal. Kumta ka Arsenal ka la donkam ban jop bad kyrmen ba ka City kan rem ne ïakhaid ha ka jingïakhun ïa ka West Ham United hynrei kam shym la long kumta, ka City ka la jop suk ïa kane ka jingïalehkai bad ruh ïa ka nam lahduh.
Lah ban pynkynmaw ba ka Arsenal ka la don ha ka kyrdan ba nyngkong bad ban tam point ïa ka Man City hynrei ka jingshah rem noh da 2-0 kol ha ka Aston Villa, ka la pynkylla khongpong ïa ka Arsenal namar wat la ka la jop lut baroh ki jingïalehkai. Hadien kane kam shym la lah pat ban poi sha ka thong naba ka City ruh hadien ba ïoh ïa kane ka kabu, ka la ïakhun tyngeh ha baroh ki jingïalehkai bad ban jop lut.
Ka Man City na ki 38 tylli ki jingïalehkai ka la ïoh 91 point kata ban jop 28 sien, ïakhaid 7 sien bad shah rem 3 sien, ka Arsenal pat kaba la ïoh 89 point ka la jop 28 sien na ki 38 tylli ki jingïalehkai, ka la rem 5 sien bad ïakhaid 5 sien.
Kumba ka long mynta, ka Man City ka la lah ban jop haduh 6 tylli ki nam lahduh ka Premier League na ki 7 tylli ki aïom.
Kane ka kynhun hapoh ka jingïalam u Pep Guar-diola ka la kot sha ka thong kaba ym don kawei pat ka club ha kane ka lympung ha England ban poi, kata naduh ba la sdang ïa kane ka lympung ha u snem 1888, kata 136 snem mynshwa. Mynta pat ka Man City ha ka 25 tarik u Jymmang kan phai khmat sha ka thong ban long ruh ka kynhun ba nyngkong ban jop lynter ïa ki ar tylli ki nam lahduh ba heh ka England ynda kan ïakynduh pyrshah ïa ka Man United ha ka final jong ka FA Cup ka ban long ha Wembley.
