Jowai, Jymmang 19
Ka lympung ïalehkai Inter School kaba tip kum ka “Chess and Scrabble Tournament” na ka bynta ki khynnah ba don ha sor ka la sdang ha ka 18 tarik Jymmang bad kan kut ha ka 25 tarik Jymmang ha Government Girls Higher Secondary School, Jowai.
Ïa kane ka lympung ïalehkai la pynïaid da ka ophis u Deputy Commissioner ka West Jaiñtia Hills kumjuh ka ophis u District Planning Officer, Jowai ryngkat ka jingïatreilang bad ka Jaiñtia Hills Chess Association bad Meghalaya Chess Association.
Haduh kumba 140 ngut ki khynnah shynrang bad kynthei ki la wan shim bynta ha ki ar tylli ki jingïakob ïalehkai Chess bad Scrabble.
Hashwa ba ki khynnah kin ïa-shim bynta ha ki jingïakob, ka la don ka jingïalang ba la pynïaid da u Bah Iaidbha Phawa, Assistant Research Officer, District Planning Officer ha ka jingdonlang u kongsan Bah FB Basan, MCS, Additional Deputy Commissioner & District Planning Officer, Jowai, ki nonghikai nalor kiwei kiwei.
La ïoh ka jingkren lamphang na u Bah S Phanbuh, MCS, Assistant Commissioner, Jowai bad ka jing-kren lyngkot na u Bah P Lhuid, President ka Jaiñtia Hills District Chess Association bad haba kut ka jingïalang la ïoh ki kyntien khublei na u Kynphammi Ryngkhlem, Research Assistant, Office jong ka District Planning Officer, Jowai.
U Bah FB Basan, MCS ha ka jingkren u la ong, ka Chess ka dei ka jingïalehkai kaba lah ban pynwan dur ïa ka jingim jong u/ka briew. Ka dei ruh ka jingïalehkai kaba donkam ïa u briew ban don ka jabieng kaba proh bad kaba ïaishah.
U la kyntu ïa ki khynnah skul ba kin long kiba ïai bteng ïa kane ka jingïalehkai kumjuh ban minot ha ki jingpule.
