Lucknow, Jymmang:
Ki heh ba dei khmih jong ka Greater Noida ki la sdang pyntreikam ban daiñ kuna pyrshah ïa ki kontraktor ïa kiba la shah kynnoh ba ki la leh bym salia ha kaba ïadei bad ka jingphah pynkhuid ïa ki jaboh ha kiba bun ki sector bad ki shnong jong ka Greater Noida, la ïathuh ki heh pulit.
Ïa ka jingdaiñ kuna la pyntreikam hadian ba ka kynhun jong ki heh ba dei khmih ka la leit ban jurip bniah ïa kiba bun ki jaka ha kaba la pyntreikam torti ha kaba ïadei bad ka jingpynkhuid ïa ki jaboh bad la shem ba ki la don kumba katto katne ngut ki kontraktor kiba la leh bym salia ha ka ban pynkhuid ïa ki jaboh.
Ïa ka jingleit jurip bniah la pynlong da u heh ophisar jong ka Greater Noida uba dei khmih halor kane ka bynta u Santosh Kumar bad u Project Engineer u Chetram Singh ha ka shnong Tugalpur hajan Pari Chowk.
Kine ki la pynlong ïa ka jingleit jurip bniah ha ki thaiñ ba long ïew jong ka shnong Tugalpur bad la shem ba kam shym la don ka jingpyntreikam ban pynkhuid ïa ka jaboh bad ki ñiut ha kaba kine ki la satah ha kylleng ki jaka ha kaba ka la long kaba isaitmet bha.
Ka kynhun jong ki heh ba dei khmih, ka la daiñ kuna da kumba `. 50,000 pyrshah ïa ki kontraktor kiba la shah thung na ka bynta ban khmih bniah ha ka rukom pynkhuid ïa ki jaboh-jabaiñ kiba don ha kylleng ki jaka jong kane ka thaiñ.
U Chief Executive Officer jong ka Greater Noida u Ravikumar NG u la hukum ïa ka tnat ka koit ka khiah ba kan shim ïa ki sienjam ha ka ban pynkhuid ïa ka nongbah.
Ka la thaw ïa ka kynhun hapoh ka jingïalam jong u OSD Santosh Kumar bad u Project Engineer u Chetram Singh na ka bynta ban pynlong ïa ka jingleit khmih bniah bad ban buh ryntih ïa ki rukom pyntreikam ha kaba ïadei bad ka rukom pynkhuid ïa ki jaboh.
“Ngi la dep ban hukum ïa ki kontraktor ba ki la dei ban trei bha ïa ka kam jong ki lym kumta kin sa shah pynngat ha ki kyndon ne shah pynshitom. Ka jingleit jurip bniah jong ngi kan sa ïai bteng ha kiba bun ki shnong bad ki sector,” la ong u Santosh Kumar.
Ha ka Sngi Thohdieng jong ka taïew ba la lah, ka kynhun ba dei khmih ka la daiñ kuna da mar `. 25,000 pyrshah ïa arngut ki kontraktor haba la lap ba ki la pynkheiñ ïa ki kyndon bad ba kim shym la pynkhuid ïa ki jaboh na ki Sector 36, 37, Pi, Swarn Nagri, na ka shnong Echhar bad kiwei pat ki thaiñ bamarjan.
