Shillong, Jymmang 19
Ka Bayern Leverkusen ka la kylla long ka klob ba nyngkong ha ka lympung Bundesliga ban pyndep ïa ka aïom khlem da shah rem satia.
Kane ka kynhun hapoh ka jingïalam jong u Xabi Alonso kum u Manager ka la dep ban jop bad rah lypa ïa ka nam lahduh jong kane ka lympung hynrei ka la ïoh ban thaw histori pat ha ka sngi Saitjaiñ hadien ba ka la jop ïa ka Augsburg da 2-1 kol ban pyndep ïa kane ka lympung khlem da shah rem satia.
Ha kane ka aïom, la ïoh ban sakhi ruh ba ka Bayern Munich kaba la bat nam lahduh bunsien jong kane ka lympung, ka la hiar syndon sha ka kyrdan ba lai hadien ba shah rem noh da 4-2 kol ha ka Hoffenheim ha ka jingïalehkai kaba khatduh, kaba la ailad pat ïa ka Stuttgart ban kiew sha ka kyrdan kaba ar.
Ha kane ka aïom, ka Leverkusen haduh mynta ka la jop lynter khlem shah rem haduh 51 sien, kata ha baroh ki lympung jong kane ka aïom bad mynta ki jingjop ha ki ar tylli ki jingïalehkai kiba dang sah, kan pynlong syndon ïa ka Leverkusen ban rah ïa 3 tylli ki nam lahduh ba heh ha ka sien kaba nyngkong eh.
Mynta ka Bayern Leverkusen kan pynkhreh ban ïakhun pyrshah ïa ka Atalanta ha ka final jong ka lympung Europa League ha Dublin ka ban long ha ka sngi Balang, bad yn bud pat sa ka final jong ka German Cup ban ïakhun pyrshah ïa ka Kaiserslautern ka klob na ka lympung Second Division ha Germany.
Ka Leverkusen ka la lah ban tam ïa ka rikod ka Benfica kaba la jop 49 sien kynthih hapdeng u snem 1963 bad 1965. Ha kane ka aïom, ka Leverkusen na ki 34 tylli ki jingïalehkai ha ka Bundesliga ka la jop 28 tylli bad ïakhaid 6 tylli, ha kaba ka la khyrwit 89 tylli ki kol bad shah thep tang 24 tylli.
