Ki jingkhmih lynti ki bun bah na ka khlieh duh ka tnat pulit lane ka Director-General of Police (DGP) bathymmai ka jylla, ka Kong Idashisha Nongrang, IPS, kaba la shimti ïa ka kam ha ka 20 tarik Jymmang, bad ka ban neh na ka bynta ar snem kynthih. Ka daw ba hakhmat eh ba ki bun ki jingapkhmih lynti na ka Kong Nongrang ka long ba ka dei ka trai shnong bad kaba tip kham bha ïa ka jylla bad ïa ki nongshong shnong haba ïanujor bad kiwei pat kiba la wan hashwa jong ka. Na kiwei, ki paidbah, khamtam ki trai ri trai muluk, kim da khmih lynti than namar ki sngewthuh ba kim da don ka jingnang jingtip halor ka jinglong jingman jong ka jylla bad ki nongshong shnong. Hooid, ka don tang kawei ka aiñ kaba treikam na ka bynta baroh, la ki dei ki trai shnong ne kiwei pat, hynrei ban pynduna pat ïa ki jingeh ba ki paidbah ki ïakynduh na ka daw jong ki pulit, ka long kaei-kaei kaba kiba bun ki khmih lynti ba kan urlong.
Kawei na ki jingeh kaba la pynpaw da kiba bun ba lang ka long ka jingdon jong ki pulit kiba smat ban ïeng ha surok bad ban khrong pisa na ki kali. Mano kiba aibor ïa kita ki pulit ban ïeng surok shiteng miet ban lum pisa? Lada ki pulit ki don ban pynthikna ba ki jingtakhuh kali kin duna ha ka miet ka ïong, yn ym don ba sngeweiei. Hynrei shisien ba la jrong ka kti ban kner ïa ka pisa ka bym dei hok ban ai bad ban shim, tang katta, ki paidbah ki sngewmong namar ka ktah ïa ka pla jong ki. Tang kiba lad mad ki sngewthuh ïa ka jingkthang. Lada ka Kong Nongrang ka lah ban pynduh pyndam ïa kane ka jingmlien basniew jong ki pulit, kan long shisha ka jingjop bakhraw. Hooid, khlem pep, kan ïakynduh mawsiang lada ka pyrshang ban pynduh ïa kane na ka daw ba kan ktah ïa ka pla jong no re jong no tangba ka dei ban tip bad sngewthuh ba ki paidbah ki don nadien ban kyrshan. Ym don kiba kwah ban shah khrong be-aiñ khamtam ha ka pyrthei hiran. Mano ba kwah ban shu leit ai ei ïa ka pisa kaba la kamai da ka umsyep sha kita ki pulit?
Sa kawei pat ka jingeh ka long ka jingjyllei palat jong u drok. Ka jingkhynra jong ka seng Hynñiewtrep Youths’ Council (HYC) ha kiba bun ki jaka bad ka Hynñiewtrep Integrated Territorial Organization (HITO) ha ki katto katne ki bynta ka pyni ïa ka jingshyrkhei jong u drok uba la ksam kylleng sawdong. Ngi dei ban ai jingïaroh ïa kine ki seng kiba la tur shakhmat namar lada shu ieh tang ha ki pulit bad ka sorkar, ngi shem ba kan ym poi shano-shano. Hooid, ngi donkam ïa ki pulit khnang ban lah ban pynshitom da ka aiñ ïa kiba donkti ban khaïi drok, hynrei tang ma ki, kam pat biang satia. Ki jingjia ha kine ki khyndiat sngi ki long kum ki sakhi ïa kane bad ym lah satia ban len.
Shisien peit, yn ym don jaka ha ki patok ban set ïa kita ki nongdie drok, kynthup ïa ki barit baria haduh kiba kham heh watla kiba heh duh kim ju ngat ha ka ruh nar. Kane ka long ka jingkyntu ïa ka HYC, HITO bad ki pulit ba kin thwet ïa kito ki nongkhaïi/nongdie kiba heh namar tang shu la ïoh ïa kine, ki barit baria kin sa shu jah rngai khlem por. Hynrei katba ym pat lah ban kem ne pynpaw pyrthei ïa kita ki nongkhaïi/nongdie kiba heh, ngin ym lah ban jop ïa kane ka thma bashyrkhei pyrshah ïa u drok. Hooid, donkam ban kyndang lut ïa ki baroh ki jaka ba ju smat ki nongdie/nongdih ban ïa die bad ïa thied drok. Ïa ki nongdie, dei ban aiti sha ki pulit katba ïa ki nongdih dei ban pynthikna ba kin ïoh ruh ïa ki lad jingsumar namar ka jingdih ne jingkyrni ha u drok ka dei ka jingpang jingshitom ha ka met.
Ka tnat pulit ka dei ban kham don ka jingïatreilang kaba jan bad kiwei pat ki jylla khnang ba ka jingïasam khubor syntiat halor ki nongkhaïi/nongdie drok kan kham kloi ban poi. Ha kajuh ka por, ka tnat pulit ka dei ban ïarap kylla ïa ka HYC bad kiwei ki seng kiba la mih shakhmat ban ïashim bynta ha kane ka jingïakhun pyrshah ïa u drok. Na ka liang ka DGP ka dei ban shimkhia ban pynkhlaiñ ïa kita ki ‘Anti-Narcotics Task Force’ (ANTF) kiba don ha man ki distrik. Ngi ïohi ba don ki ANTF kiba treikam tang ha ki katto-katne ki distrik katba ha kiba bun pat, ym ju kham paw than ki kam. Lada ym paw, ki paidbah kin mut beit ba kim treikam satia bad kin duh jingshaniah ha ka tnat pulit baroh kawei. Tangba ngin hap ban aipor katto katne ïa ka DGP bathymmai hashwa ba kin ïa sdang ban kdew kti bad ban kynnoh. Ngi kyrmen ba ka Kong Nongrang kan ai ïa kaba bha tam sha ka jylla khnang ba kan long kaba kham biang ban ïa ki por kiba la leit noh.
