Riyadh, Jymmang:
Ka ïingbishar jong ka Saudi Arabia ha ka Sngi U Blei, ka la pyntip ba u nongialam jong katei ka ri- u King Salman, u don ia ka jingshitom ha ki bynta ka shadem bad un nang hap ban shah sumar na ka bynta kitei ki jingshitom kiba u don baroh.
Ha katei ka sngi, la ong ba ka ïingbishar ka la pyntip ba ka jingkhluit ha ka met jong u Salman ka la jur palat bad dei kane ka la wanrah ia ka jingshitom kaba kham jur ha ka met jong u ha katei ka sngi bad kaba la pynlong ia ki doktor ba kin hap ban peit-bniah ban lap ia ki jingshitom kiba don ha ka met jong u. Ia u Salman la sumar bad peit-bniah da ki doktor na Al-Salam Palace hapoh Jeddah.
La ong ruh ba ka dei ka sien ba ar tang hapoh 1 bnai ba ka sorkar Saudi ka la kren shaphang ka koit ka khiah bad ka jingbym shngaiñ ka koit ka khiah jong utei u nong-ialam ba hakhlieh jong ka ri.
Kumta, lyngba ki test kiba la dep ban leh ha katei ka Sngi U Blei, la shem ba u King Salman u don jingshitom ha ki tor bad ki doktor ki la pyntip ba utei u nong-ialam un hap ban dih ia ki jait dawai ‘Antibiotics’ ban pynkhiah suki-suki ia katei ka jingshitom kaba u don tad haduh ba katei ka jingkhluit ha ka met jong u kan da jah hi noh.
U King Salman u la bat ia katei ka shuki nong-ialam kum u Syiem jong ka Saudi Arabia naduh u snem 2015. Katba u khun jong u, u Mohammed bin Salman uba la don 38 snem ka rta, u la shah thung khun syiem ha u snem 2017 bad u la lam khmat ha ki kam bapher bapher jong ka ri kum u nongialam jong ka ri ha kine ki sngi mynta.
Namarkata, la ong ba ka Saudi Arabia kaba long ka ri kaba pynmih ia shibun tam eh ka umphniang, mynta la katto katne snem katei ka ri ka la khuslai halor ka jingbym khlaiñ shuh jong utei u nongialam ka ri namar ba u la sdang ban noh ka met bad ka rta ruh ka la nang heh.
