Shillong, Jymmang 20
Wat hapdeng ki jingeh ban ïoh ïa ki madan ïalehkai kiba biang na ka daw ka shah pynthut ha ki bor ka mariang, ka Meghalaya Cricket Association kan sa ïoh ïa kawei ka jaka ïalehkai kriket ba paka (Indoor Cricket Training) ha madan Kurkalang, Bhoirymbong, Ri Bhoi District.
Kane ka la wan hadien ba kane ka synjuk ka la ïasoi soskular bad ka shnong Lumdaitkhla na ka bynta ban pyndonkam ïa shiteng ka madan kum ka jaka ïalehkai kriket.
Ka jingheh jong kane ka madan ka long kumba 7 akar ka ban kynthup lang ïa saw tylli ki jaka ïalehkai (training pitch), ka pung jngi, jaka kilan met, ki jaka khreh jong ki nongïalehkai bad kiwei kiwei. Ka jingpyntrei ïa kane ka projek ba la bei tyngka da ka BCCI, ka dang ïaid shaphrang bad la khmih lynti ban pyndep ha u Nailur mynta u snem.
Ïa kane ka projek la kam ba la plie ïa u mawnongrim lyngba ka ‘online mood’ da u President ka Board Of Control For Cricket In India (BCCI) u Rojer Binny bad u Secretary u Jay Shah kiba la wan poi ha Ri Bhoi District ha ka Sngi U Blei, hynrei ki la leit phai noh ha ka por janmiet. Kane ka jingplie ïa kiba kum kine ki projek ka la long ruh ha kiwei pat ki san tylli ki jylla ba marjan kiba don ha ka thaiñ shatei lammihngi (Arunachal Pradesh, Manipur, Mizoram, Nagaland & Sikkim).
Namar ka jingbym ïaid beit kat kum ka prokram, u President ka Meghalaya Cricket Association u Naba Bhattacharjee u la hap ban plie biang ha ka Lah Sngi U Blei ha ka jingïalang kaba la long ha katei ka madan ha kaba la ïadon lang u Bah Gideon Kharkongor kum Secretary ka MCA, u Vice President Bah Raynold Kharkamni, u Bah A.L Hek uba long u adviser jong ka shnong Lumdaitkhla, ki nong-kitkam ka shnong Lumdaitkhla, ki nongmihkhmat jong ki synjuk ïalehkai kriket lem bad ki khynnah ïalehkai kriket kiba la wan na kylleng ki district.
Na ka liang ka Meghalaya Cricket Association ka la buh ïa ka jingtyrwa na ka bynta ban tei ïa ka jaka sah khnang ba ki nongïalehkai kriket kin lah ban sah ha katei ka jaka kumba katto katne por ha ka por ba ki kilanmet. Ïa mynta ka dang wad jaka ruh ban buh ïa kum kane ka projek ha Garo Hills.
Haba ai jingkren ha kane ka sngi, u Bah Gideon Kharkongor u la ong ba u Secretary ka BCCI lem bad u President ki la kwah ban pynlut ïa ka por ha kane ka jingïalang, hynrei na ki daw kiba kyrkieh ki la hap ban leit phai noh.
Na ka liang jong u, kumjuh u Naba lem bad u Bah Hek ki la pynpaw ka jingïaroh ïa ka Dorbar Shnong Lumdaitkhla, kaba la kwah ban don ka jingïadei kaba jan bad ka MCA da kaba ka la ai ïa kane ka jaka ha ka jingheh kaba 7 akar.
“Ka jingdon ïa kum kane ka jaka ïalehkai kan long ka jingïarap ban kyntiew ïa ki nongïalehkai ka Jylla khamtam ha kum kane ka juk kaba mynta,” la bynrap u Bah Kharkongor da kaba ong ba kum kane ka jinglong ka mariang ka long kaba eh ban ai jinghikai ïa ki nongïalehkai, hynrei ka jingdon ïa kum kine ki jaka ïalehkai kan long ka jingïarap ïa ki.
“Na ka liang ka Sorkar Jylla ka la tyrwa ïa ka jaka ha Mawkhanu, hynrei ngin hap ban bishar bniah shwa ha shwa ba ngin jam shakhmat.”
U Bah Hek u la jingïaroh halor ka rai jong ki nongïalam jong ka shnong Lumdaitkhla namar ki don ka jingïohi jngai na ka bynta ka lawei ki nongïalehkai. “Nga sngewkmen ïa ka jinglong la kloi jong ki ban ïatrei lang bad ka MCA lem bad ka BCCI,” u la bynrap.
