Hyderabad, Jymmang:
Ki la don lai ngut ki briew kiba la duhei ïa la ka jong ka jingim ha ki jingjia ba bun hadien ka jingtied u pyrthat ha Vikarabad distrik jong ka Telangana ha ka Sngi U Blei, la ïathuh ki pulit, ha ka jingïakren bad ki nongthoh khubor.
Kine ki jingjia ki la jia ha ar tylli ki shnong kiba don ha ka thaiñ Yalal jong ka Vikarabad distrik jong ka Telangana ha ka por ba jur bha u slap, la ïathuh shuh shuh ki pulit.
Ar ngut ki briew ki la ïap haba ki la shah pom pyrthat ha ka jaka rep jong ki katba uwei pat u briew u la ïap ha ka por ba u dang ïeng ha trai dieng, la ïathuh shuh shuh ki pulit. Kine kiba la ïap ki dei kiba don ha ka rta kaba hapdeng 26 snem haduh 40 snem, la bynrap ki pulit.
Ka Met Centre of Indian Meteorological Department (IMD) ha Telangana ka la dep ban ïathuh lypa shaphang ka jingwan hap jong u slap ha ryngkat ka lyer ki ban wan ryngkat bad ka jingtied pyrthat bad ka jingbeh jong ka lyer kan sted haduh 30-40 KMPH, ha kaba la ong ba kane kan sa jia ha ki jaka kiba bun kiba hap hapoh ka distrik Bhadradri Kothagudem, Khammam, Nalgonda, Suryapet, Siddipet, Yadadri Bhuvangiri, Rangareddy, Hyderabad, Medchal Malkajgiri, Vikarabad, Medak, Nagarkurnool bad Wanaparthy kiba ha Telangana ha ka Sngi U Blei.
