Rafah, Jymmang:
Ka tnat iada jong ka Palestine ha ka Sngi U Blei ka la iathuh ba ka jingther bom jong ka Israel sha ka phang pdeng jong ka nongbah Gaza ha katei ka sngi, ka la shim ia ka jingim jong 31 ngut ki briew. Kane ka la jia wat hapdeng ka jingleit hiar jong u National Security Advisor ka US- u Jake Sullivan uba dang leit ban iakren bad ki heh ka Israel na ka bynta ban tehlakam ia ki jingma kiba ap na ka jingleit hiar thma ba khlem sangeh jong ka Israel sha Gaza.
Namar la ong ba ki shipai ka Israel ki la leit ban rung shapoh ka thaiñ Southern jong ka nongbah Rafah, ha kaba ka Israel lem bad ka tnat shipai jong ka ki la pynksan bad ong ba kane kan long ka sien hiar thma ba khatduh jong ka Israel ha Gaza namar ka Israel ka la ioh jingtip ba baroh ki dkhot bad ki nongialam ba dang sah jong ka kynhun lehnoh Hamas, ki don ha katei ka nongbah Rafah jong ka Gaza. Kumta ruh ka Israel ka la rai ban leit hiar thma khatduh ia katei ka nongbah Rafah jong ka Gaza ha shwa ba ki shipai ka Israel kin ioh ban synshar hi noh ia ka nongbah Gaza ynda la dep ban pynkhyllem lut ia kitei ki lehnoh kiba don ha Rafah baroh.
Na ka liang ki heh ka Hamas pat, ki la pyntip ba ka Ezzedine Al-Qassam Brigades, ka la thmu ban ther bom sha ki shipai ka Israel kiba don ha khappud ka nongbah Rafah jong ka Gaza kaba ki shipai ka Israel ki la leh trai bad kheiñ ia katei ka bynta kumba ka long ka jong ki.
Wat hapdeng ka jing-iakhun thma mar kylliang, ka Gaza ka la pyntip ba ka jingther bom jong ka Israel shi miet- shi miet sha Gaza ka la shim ia ka jingim jong 31 ngut ki riew paidbah kiba don ha katei ka bynta jong ka nongbah Rafah bad kumba 20 ngut pat kiba la mynsaw na ka jingjulor ki iing ki sem ha ki bom jong ka Israel ha katei ka miet.
