Guwahati, Jymmang:
Da ka jingïai pyntreikam pyrkhing bad da ka jingïai bteng ïa ki jingkhynra, la ïoh ban kurup ïa u Heroin uba la kot sha ka T. 105 klur da ki pulit ha Cachar, kaba don ha Assam ha ka Sngi U Blei.
Kumba la ïathuh ka tyllong khubor, la ong ba une u drok ba la ïoh ban kurup u dei uba la wan na Mizoram bad la song bad buhrieh bha ha ki bynta jong ka kali. Hadien ba la ïoh jingtip shaphang ka jingdon jong ki nongkhaïi drok, ki pulit ki la pynlong ïa ka jingleit thwet bad kem ïa lai ngut ki briew kiba la don bynta ban kit ïa une u drok.
Ïa ka kali jong ki la ïohbat bad haba la khmih bniah, ki pulit ki la lap ïa u drok uba la don ka jingkhia kaba 10.33 kg ba la buhrieh hapoh jong ka. Na baroh u drok, ki pulit ki la lap ïa u drok ba 1.54 kg ba la buh ha ki synduk sabon bad kumba 8.78 kg ki song ba la buh ha katto katne tylli ki pla.
Ki pulit ki la ïathuh ba haba la khmih bniah bad thew, ki la shem ba une u drok u la kot sha ka dor kaba T. 105 klur. Ki lai ngut ki briew kiba la shehkm ha kane ka jingjia ki dei ki nongshong shnong jong ka jylla bamarjan na Mizoram. Ka jingtohkit ha kaba ïadei bad ka jingjia ka dang ïaid shakhmat.
