Aizawl, Jymmang:
Ki la don palat 80 ngut ki poiwir na Chittagong Hill Tracts (CHT) jong ka Bangladesh kiba la rung sha ki bynta jong ka Mizoram ha ka sngi U Blei. Kumba la ïathuh ka tyllong khubor la ong ba ki la don ki poiwir kiba la ïaid lyngba ka khlaw da palat shi bnai ban poi sha Mizoram na ki shnong jong ki kiba don ha CHT, la ïathuh ka tyllong khubor.
Kiba bun na ki ki dei ki bym biang ki jaiñ phong bad kim ju ïoh bha ka bam ban bam da bun taïew, la ïathuh shuh shuh ka tyllong khubor. Ki la don kumba 300 ngut ki briew kiba dei na ka jait bynriew riewlum Bawm, kawei ka kynhun ki riewlum kaba don kijuh ki dustur kum ki Mizo na Bangladesh kiba haduh mynta ki la leit sha Mizoram ha kine ki taïew ba la leit.
Ki la don kumba 1,241 ngut ki briew kiba don kijuh ki riti-dustur jong ki kynhun ka Mizoram na Chittagong Hill Tracts ha Bangladeh kiba la dep ban buhai shnong ha Lawngtlai distrik. Ki la sdang ban rung sha Mizoram ha u Naiwieng jong u snem 2022 namar ki jingïakhun pyrshah jong ki shipai Bangladesh pyrshah ïa ka kynhun Kuki-Chin National Army (KNA), kawei na ki kynhun kieng atiar kaba ïakhun na ka bynta ka jingdawa ban phah phia jylla.
