Shillong, Jymmang 20
Ka St. Edmund’s lem bad ka Sunrise Academy ki la lah ban pynthikna ban jam sha ka final ha ka lympung ïalehkai Inter School Under-15 Cricket Tournament ba la pynïaid da ka Shillong Cricket Association.
Ha ka jingïakhun semi final kaba la long ha ka Lah Sngi U Blei ha madan Polo, ka St. Edmund’s ka la pynliem noh ïa ka St Anthony’s da 60 run. Ka St. Edmund’ kaba la shimti ban tied nyngkong ka la kamai 118 run ha ki 10 over. U Mannan Surana u la tied 84 run na ki 44 bol bad u Nitik Singhania u la ïoh 19 run na ki 16 bol.
Haba wan beh ïa ka thong, ka St. Anthony’s ka la kamai tang 57 run bad shah pynhap 8 wiket ha ki 10 over. U Samelawan u la tied 17 run na ki 12 bol. Katba u Satyam Sharma u la shim 4 wiket bad 2 wiket la shim da u Natik Singhania na ka bynta ka St. Edmund’s. Ïa ka nam Player of the Match la ïohpdiang da u Mannan Surana uba la kamai 84 run bad shim shi wiket.
Haba phai sha kawei pat ka jingïakhun semi final kaba ar, ka Sunrise Academy ka la jop da 24 run ïa ka Nongthymmai Nepali School. Ka Sunrise Academy kaba la shimti ban tied nyngkong ka la kamai 68 run bad shah pynhap 1 wiket ha ki 10 over. U Sparsh Sewa u la tied 30 run na ki 29 bol bad u Faizan Mondal u la ïoh 25 run na ki 28 bol. Katba u Runu u la khur shi wiket na ka bynta ka Nongthymmai.
Haba wan beh ïa ka thong, ka Nongthymmai ka la kamai tang 47 run bad shah pynhap 7 wiket ha ki 10 over. U Suraj Chettri u la tied 12 run na ki 17 bol. Katba u Suraj Yadav u la shim 3 wiket bad 2 wiket la shim da u Faizan Mondal bad ïohpdiang ruh ïa ka nam Player of the Match.
