Imphal, Jymmang:
Ki pulit jong ka Manipur ha ka Sngi U Blei ki la kem ïa uwei u briew uba la shah pynshisha ba u dei u dkhot jong ka United National Liberation Front -Pambei (UNLF-P) ha ryngkat ki tiar siat bad ki kuli. Une u briew u la shah pynshisha ba u la donkti ha kiba bun ki kam dawa pisa, la ïathuh ki pulit hynnin ka sngi.
Haba la ïoh jingtip shaphang ka jingdon jong une u briew, ka kynhun jong ki pulit ka Imphal West District bad ki Commando jong ki pulit ka Manipur ki la pynlong ïa ka jingleit khynra ha kawei ka shnong ha Mayang Imphal Road kaba hap hapoh ka Imphal West District ha ka por 4 baje janmiet jong ka sngi U Blei.
Na ka jingpynlong ïa kane ka jingleit khynra la ïoh ban kem ïa une u dkhot ba dang trei mynta jong ka kynhun UNLF (P) ïa uba la tip kyrteng kum u Asem Nabachandra Meitei (41).
