Shillong, Jymmang 20
Ka lympung ïalehkai Under-18 Inter School Cricket Tournament 2024 ka la jan poi artad sha kaba kut ha kaba ka St Xavier’s bad ka B.K Bajoria ki la jam sha ka final hadien ba ki la khur ïa ka jingjop ha ka Lah Sngi U Blei.
Ha ka semi final kaba nyngkong kaba la long ha madan Polo, ka St Xavier’s ka la pynliem noh ïa ka K.V Upper Shillong da 37 run. Ka St Xavier’s kaba la kam trai ban tied nyngkong ka la kamai 113 run bad shah pynhap 3 wiket ha ki 10 over. Hynrei haba wan beh ïa ka thong ka KV Upper Shillong ka la kamai tang 86 run bad shah pynhap 4 wiket ha ki 10 over. Ïa ka nam Player of the Match la khur da u Rudra Rathore uba la tied 63 run bad shim 1 wiket.
Haba phai sha kawei pat ka jingïakhun kaba ar, ka BK Bajoria ka la jop da 7 wiket ïa ka R.B Anup Chand. Ka RB Anup Chand ka la kamai 67 run bad shah pynhap 9 wiket ha ki 10 over. Hynrei haba wan shimti ïa ka pali kaba ar ka BK Bajoria ka la lah ban kynjoh sha ka thong da kaba kamai 68 run bad shah pynhap 3 wiket ha ki 8.4 over.
