Mumbai, Jymmang:
Na ka jingkhmih bniah lyngba ka Disaster Management Survey ba la pynlong da ki heh sorkar jong ka Raigad la shem kane ka distrik kaba don ïa 520 tylli ki shnong kan sa shah ktah jur na ki jinglynshop bor ka mariang, kum ka jingtwa khyndew, ka jingshlei um bad ka jing-rong noh jong ka um ïa ka khyndew namar ka jingjur palat jong ka jingat phyllung, la ïathuh ki heh ba dei khmih.
Ki la don kumba 239 tylli ki shnong kiba ju kham jia kine ki jingjia, 136 tylli ki shnong ki dei ki ban sa ïakynduh jingeh na ki jingshlei um bad 145 tylli ki shnong kin shah ktah ha kaba ïadei bad ka jingkhlaiñ palat ka jingat phyllung, la ong u heh sorkar.
“Katkum ka jingïathuh jong ka IMD, la ong ba kin sa don kumba 22 tylli ki jingat phyllung ha kum kane ka aïom slap. Kin sa don kumba katto katne ki jingat phyllung ki ban kiew da kumba 4.5 metres. Shuh shuh la ong ba ki la don kumba 262 tylli ki shnong ha ka distrik kiba don harud jong ka wah Aamba, Patalganaga, Gadhi, Savitri, Gandhari, Ulhas, Kal bad Kundalika Balganga, u la ong.
