Naduh ki snem kiba mynshwa bad haduh mynta, ngi ïohsngew ïa ka jingkynnoh ba ka don ka jingpyndonkam bakla da ki seng saiñpyrthei kiba shong ha ka shuki ïa ki kynhun tohkit la ka dei ka Central Bureau of Investigation (CBI), Enforcement Directorate (ED) bad kiwei. Ha kine ki snem ba ka BJP ka la synshar, kata, naduh u snem 2014, ngi shem ba kane ka jingkynnoh ka mih na ka por sha ka por. Ki seng kiba don ha Liang Pyrshah ki kynnoh ba ka sorkar BJP ka phah tur ïa ki kynhun tohkit tang sha ki jylla kiba la synshar da kiwei pat ki seng saiñpyrthei namar ka kwah ban pynhiar kput ïa ki nongïalam jong ki seng ki bym don jingïadei bad ka BJP. Hynrei ka BJP ka la kam ba kane baroh ka dei kum shi bynta ban kem ïa ki briew kiba donkti ha ki kam bamsap bamngem.
Ngi sngewdei ba ïa ka bamsap bamngem dei ban rat dyngkhong na kane ka Ri bad ba ki kynhun tohkit kin leit khynra bad kem ïa kiba donkti. Hynrei kaei kaba ngi shem ka long ba ka BJP kam ïapher than na ka Congress ha ka por ba ka dang synshar. Ka Congress ka la ñion beit ïa kito ki nongïalam bad ki seng ki bym kyrshan ïa ka. Mynta ngi ngi ïohi ïa kajuh kaba ka BJP ka leh. Ka jingphah tur ïa ka CBI bad ED sha ki jylla bym synshar ka BJP ka la long shaba palat. Ngim ngeit ba ki jylla kiba synshar ka BJP lane ki seng saiñpyrthei kiba don jingïadei bad ka ki long kiba khuid ba suba. Ka jingbamsap kan don beit ha ki jylla kiba kum kine hynrei ngim lah leh eiei pat haba kaba bat ïa ki kynhun tohkit ka dei ka Sorkar Pdeng. Ngi sngewthuh ba kine ki kynhun tohkit kin hap ban leit kat shaba phah ka Sorkar Pdeng bad kin ym lah ban ïaid lait na kata. Ngi ïohi ruh ba lada don ka jingshah kynnoh bamsap jong uwei na ki nongïalam seng saiñpyrthei bym don jingïadei bad ka BJP, kita ki jingkynnoh bad wat ki jingtohkit ruh kumjuh ki jah rngai noh tang mar ïa pynïasoh sha ka BJP. Lehse ka BJP ka long kum ka kor ka bor kaba pynkhuid ïa ki nongbamsap. Katba dang pyrshah BJP ki dei kiba bamsap na kiba bamsap tam, hynrei tang shu la pynïasoh sha ka BJP pat, ki dei kiba khuid ba suba haduh katta katta.
Ka jingleh saiñpyrthei ïa ka kam bamsap bamngem kan ym ïalam ïa ka Ri sha ka jingbha bad jingkhuid. Lada jia ba ka BJP ka duh bor noh ha ka ilekshon, ka sorkar kaba thymmai kan sa kput kylla sa ïa ka BJP haduh ban da jem jai. Shaei ngin poi haba kumta? Lada ka BJP ka ngeit shisha ha ka jingpynkhuid ïa ka synshar ka khadar da kaba rat dyngkhong ïa ka bamsap bamngem, ka dei ban phah wan ïa kita ki CBI, ED sha Meghalaya ban tih bniah ïa ki kam hangne. Na ka por sha ka por, ngi la ju kyntu ïa ka Sorkar Pdeng ba ka dei ban wanrah ïa ki kynhun tohkit ban lap haei ka don ka jingbamsap. Lah ban kdew ba ha kine ki snem bad ki bnai, ka BJP ka la kynnoh ba ka sorkar ba la ïalam da u Conrad K. Sangma ka la donkti ha ki kam bamsap bamngem kum ka jingpyntreikam ïa ka Saubhagya Scheme, ka jingtih bad jingkit dewïong be-aiñ, ka jingpyndonkam bakla ïa ka pisa ba la phah da ka Sorkar Pdeng sha ka Jaiñtia Hills Autonomous District Council (JHADC) bad Garo Hills Autonomous District Council (GHADC) bad kiwei.
Ngi kwah ba ka jingtohkit pyrshah bamsap kan long beit ha baroh ki jylla salonsar khlem da peit seng ne paralok lym kumta ngin ym lah ban ïaleh pyrshah ïa ka bamsap bamngem bad ngin nang ïai ran shadien. Ki paidbah salonsar kim kyrshan ïa ka jingbamsap namar ki sngewthuh ba kiba shah ktah nyngkong eh ki dei ma ki. Kat kane ka jingduk, jinghiran, jinglynga jingpisa, hynrei ki don pat kiba dang lapmiet ban kjit na u paidbah da kaba donkti ha ki kam bamsap. Kynñioh kane ka jingpynkhuid ïa ki nongbamsap da kaba phah rung ïa ki sha ka BJP katba ïa ki bym treh, ki shah tangon ha ki aiñ ki kanun kiba da ki spah tylli. Ha kaba kut, ngi kwah ba ka hok kan synshar bad kan ïeng rasong khlem da peit mano ba don liang shano, bad kiba la lap ba ki donkti, dei ban pynshitom katkum ki kyndon aiñ.
Ha ka jingshisha, ka kam bamsap bamngem kam dei ban don jingïadei bad ka saiñpyrthei, hynrei kane ka shu kut noh tang ha ka jingïakren, jingpyrta. Balei ban shu leh klet ïa ki saiñpyrthei bad ki heh saiñpyrthei kiba la ju shah kynnoh donkti ha ki kam bamsap bamngem lada ki kylla rong bad ïasnoh kti bad ka seng kaba ïalam ïa ka jingsynshar? Mynta ka dei ka BJP bad ha ki sngi ki ban wan ka lah ban dei noh da kawei ka seng saiñpyrthei. Kane ka mut ba kito kiba la phet sha ka BJP namar ka jingshah kynnoh bamsap kin hap ban mih noh na ka BJP lada wan da kawei pat ka seng ne kynhun ka ban synshar ïa ka Ri. Haba kumta, ka jingïakhun pyrshah ïa ka bamsap bamngem ka long kamkai bad ka long kum ka jingrkhie beiñ ïa ki nongshong shnong kiba buh jingshaniah ha kita ki seng bad ki nongïalam ban pynkhuid ïa kane ka Ri na kiba bun ki jyrsieh kiba la pynran dien ïa ka Ri baroh kawei.
