Shillong, Jymmang 20
U MLA ka Pynthorumkhrah Constituency bad uba long ruh u adviser jong ka shnong Lumdaitkhla u Bah A.L Hek u la ong ba ka Meghalaya ka dei ban pynmih da ki nongïalehkai kriket kiba napoh ka Jylla bad ym shuh ban wanrah da kiba nabar.
Haba ai jingkren ha ka jingïalang ban plie ïa u mawnongrim na ka bynta ka Indoor Cricket Training Ground ha ka Lah Sngi U Blei, u Bah Hek u la ïathuh ba u la ïakynduh ïa u President ka Board Of Control For Cricket In India (BCCI) u Rojer Binny lem bad u Secretary u Jay Shah ha kaba ki la pynpaw ba ka Meghalaya kam dei shuh ban wanrah da ki nongïalehkai kiba nabar Jylla, hynrei ka dei ban pynmih noh da ki nongïalehkai kiba napoh kane ka Jylla.
“Te kumta nga la kyntu ïa baroh ki khynnah kiba don ïa ki sap ha ki jingïalehkai bapher bapher ba phi dei ban trei shitom na ka bynta ban pynkylla dur ïa ka jylla ha ki kam ïalehkai bad shisien ka sngi phin sa ïoh ban ïalehkai ym shuh tang hapoh ka Jylla, hynrei ha ki lympung ïalehkai hapoh ka ri bad wat shabar ri ruh kumjuh.”
Ha kawei pat ka liang u President ka Meghalaya Cricket Association u Naba Bhattacharjee u la ong ba ka Jylla ka la sdang ban pynïalehkai tang da ki nongïalehkai kiba napoh ka Jylla bad mynta ka Meghalaya ka la ïoh rung sha ka Elite Group jong ka Ranji Trophy hapoh ka jingïalam u Kishan Lyngdoh kum u kapten bad uba la long ruh u nongtied ba kynsai.
U la ong ba ka Jylla ka la nangkiew shaphrang ha ka kam ïalehkai kriket bad u la khmih lynti ba napdeng ki khynnah ïalehkai kin sa don iwei lane ar ngut ki ban ïoh ka lad ban mihkhmat ïa ka ri india ha ki kyrdan ïalehkai bapher bapher.
