Shillong, Jymmang 21
U Marcus Rashford bad u Jordan Henderson kim shym la don hapoh ka thup kaba 33 ngut rangïalehkai ba la jied da u Gareth Southgate na ka bynta ka England ha ka Euro 2024.
U Rashford uba long u rangïalehkai ba dang 26 snem ka rta jong ka Manchester United, um shym la lah ban ïalehkai bha ha kane ka aïom, ha kaba u la ïoh ban thep 6 kol bad ïarap pynbuh bol ar tylli ha ki 33 sien ïakhun.
Une u rangïalehkai u la ïoh ban ïalehkai hynñiew sien na ka bynta ka England mynta aïom ha shwa ban un shah weng na ka jingïakhun pyrshah ïa ka Belgium ha u Lber.
Kumjuh u Henderson u la ïasoh sha ka Al-Ettifaq kaba na Saudi Arabia hadien ba u la mih na ka Liverpool ha ka aïom ba la lah hadien ba um shym la lah ban ïalehkai bha na ka bynta ka Ajax ha u Kyllalyngkot.
U Southgate u la bteng ban jied biang ïa u watla u la leit ïalehkai sha ka Saudi Pro League, hynrei u la shah beiñ ïa ki katto katne ki paidbah nongkyrshan ka England hadien ba u la wanphai biang ban ïalehkai na ka bynta ka ri pyrshah ïa ka Australia ha Wembley ha u Risaw.
U Henderson u la don lang bad ka kynhun ha ka jingïalehkai paralok ha u Lber pyrshah ïa ka Brazil bad Belgium, hynrei um shym la ïoh ban ïalehkai bha.
U Southgate un sa pynduna sa kumba hynñiew ngut ki rangïalehkai hashwa ba un pynbna ïa ka kynhun kaba khatduh kaba don 26 ngut ki rangïalehkai na ka bynta ka lympung ka ban long ha Germany.
