Shillong, Jymmang 21
U Rangbah Shnong ka Lumdaitkhla, Bhoirymbong u Bah S.T Rympei u la ïathuh ba shiteng na ka madan ïalehkai ha Kurkalang la aiti sha ka Meghalaya Cricket Association ba kan pyndonkam, hynrei ïa kaba sah yn pyndonkam ha ka jingïalehkai phutbol bad basketball.
Haba ïakren bad U Nongsaiñ Hima, u Bah Rympei u la ïathuh ba ka jingheh jong kane ka madan ka don haduh 19 akar, hynrei la aiti sha ka MCA tang 7 akar duna na ka bynta ban tei ïa ka Indoor Cricket Training Ground. “Ha ka jingshisha kane ka madan kham ha shwa ka dei beit tang na ka bynta kawei ka jingïalehkai, hynrei hadien ba ngi la ïakynduh ïa ki dkhot ka Meghalaya Cricket Association ngi la rai ban phiah noh ha ki ar bynta. Te kumta ngi la ai ïa ka jaka kumba 7 akar duna sha ka MCA bad ïa kaba dangsah sa kumba 12 akar yn pyndonkam ha ka jingïalehkai phutbol bad ka jingïalehkai basketball.”
U la ïathuh ba kum ka shnong ka kwah ban kyntiew lang ïa baroh ki jait jingïalehkai la ka long ka cricket, football, basketball bad kiwei kiwei.
Ha kaba ïadei bad ka madan phutbol, u Bah Rympei u la ïathuh ba kat kum ka jingïateh kular, ka MCA kan sa pynbiang ha ka ban pynmadan, kumjuh ban thung phlang, ban pynïeng ïa ki dieng kol namar ïa ka madan ïalehkai phutbol yn sa rah noh kham sharum lem bad ka jaka ïalehkai basketball.
“Ka jingdon ïa ka madan ïalehkai phutbol kan pynmyntoi ym tang ïa ka shnong Lumdaitkhla, hynrei ïa ka Eastern Ri Bhoi bad ka dong Ri Bhoi hi baroh kawei,” u la bynrap.
Shuh shuh u la ong ba ka liang ka shnong ka pdiang sngewbha ïa kino kino ki jingtyrwa kiba wan la ka long na ka Sorkar Jylla na ka bynta ban wanrah ïa ki projek bapher bapher kiba ïadei bad ki kam ïalehkai.
