Shillong, Jymmang 21
U rangïalehkai shapdeng ka Ger-many u Toni Kroos un shongthait noh hadien ka lympung ïalehkai European Championship 2024, la pynbna ka klob jong u ka Real Madrid ha ka Sngi Ba-ar.
Ka Madrid ka la ong ba utei u rangïalehkai ba la 34 snem ka rta uba la ïalehkai ha ki lympung ïalehkai bar ri jong ka Germany, u la rai ban pynkut noh ïa ka kam ïalehkai phutbol hadien ka Euro 2024.
“Ka kam ïalehkai phutbol ka jong nga kan kut noh ha kane ka aïom lyiur hadien ka Euro championship,” la pynpaw une u rangïalehkai ba la 34 snem ka rta, uba la ïadon bynta bad ka Germany ban rah nam jop ha ka World Cup 2014.
Ha shwa ka European Championship, u Kroos un ïoh ïa ka lad ban ïadon bynta bad ka Real na ka bynta ka jingïakhun final jong ka Champions League ha ka sien kaba hynriew ha kaba kane ka kynhun kan ïakhun pyrshah ïa ka Borussia Dortmund ha Wembley ha ka 1 tarik u Jylliew.
U Kroos u la don bynta ruh ban rah nam jop ha ka Champions League bad ka Bayern Munich ha shwa ba un leit ïasoh sha katei ka klob kaba khlaiñ bor na Spain.
Kum ban shu pynkynmaw u Kroos u la pynïasoh sha ka Real ha u 2014 bad u la long u rangïalehkai uba kynsai na ka bynta ban ïasoh lang bad u Luka Modric.
Kat kum ka kyrwoh ba la pyllait hapoh ka website, ka Real ka la ong ba ïa u Kroos yn ïai kynmaw ha ka khana pateng jong ka Real Madrid kum uwei hapoh ka klob bad kum u khlur ïalehkai ba kynsai ha ki lympung ïalehkai bar ri. U Kroos u la ïadon bynta ruh ban khur ïa ka nam lahduh haduh saw sien ha ka La Liga.
